Oshikondo shoondholongo mu Zimbabwe kashi na oshimaliwa

BULAWAYO – Uuministeli wUuyuuki wa Zimbabwe, mboka omwedhi dha zi ko wa ndopa okufala aanandolongo kOmpangu molwashoka kapu na iiyenditho, owa ti kuttya kau na oshimaliwa shokukaleka oondholongo moshilongo monkalo yi li nawa.

Shika oshi li ngaaka molwashoka aniwa ina yapewa oshimaliwa sha gwana mEmbo lyoshimaliwa shOmulekeneno lyEpangelo. Ominista yUuyuuki, Patrick Chinamasa, okwa lombwele ZimOnline mEtine kutya Uuministeli we owa pewa ashike shOondola dhAamerika/US$327 000 kUuministeli wIimaliwa.
Chinamasa okwa ti kapu na nande oshihauto shimwe shOshikondo shOodholongo tashi longo na shika osha tula Oshikonso shika muupyakadhi uunene.
‘Kapu na oshimaliwa okusa kUuministeli wIimaliwa na otwa kala ta tu indile Uuministeli (wIimaliwa) esiku kehe, ta tu kongo oshimaliwa tu pangele iiyendiotho, ihe oshilongo kashi na oshimaliwa, h Chinamasa osho a popi ngaaka.
Okwa ti Uuministeli we okwa li wa nuninwa oshimaliwa shOondola dhAamerika oomiliona omulongo naheyali, ihe aniwa owa pewa ashike Oondola/US$327 000.
Okwa ti oshimaliwa ashike shoka ya pewa oshu ukithwa melando lyiikulua, iikutu, omakumbatha, uukopi, uuyaha niinima yilwe, ihe natango ina shi gwana okulanda iinima mbika.
Omathimbo ga zi ko, aapanguli naanavetakalelipo oya kala nokunyenyetela Oshikondo shOondholongo, sho sha nyengwa okufala aafekelwa kOmpangu. Mu Apiilili nuumvo, Otelevisi ya South African Broadcasting Corporation oya li yu ulike onkalo ombwiinayi moka mu na oondholongo mu Zimbabwe, moka wo mwa holoka aandholongo ya nanga noonkondo kondjala.
Nande ongaaka, Okomitiye yOpaigwana yehangano lyOmushigakano Omutiligane, oya li ya tameke okwoopaleka onkalo moondholongo mu Zimbabwe. ZimOnline