Oshigwana sha kwathela metungo lyoongodhi dholusheno

IILONGA yokutunga oongodhi dholusheno okuza koCaprivi konyala oya pwa ooperesenda 70.

Iilonga mbika ta yi pula oodola oobiliona 3,2 ota yi ka mangela kumwe omakwatathano golusheno giilongo sha Zimbabwe, Botswana, Zambia na Namibia(ZiZaBoNa). Epatululo lyolusheno olya tegelelwa li ka ningwe muApilili omumvo ta gu ya.Eyo komeho lyiilonga mbika ota li pandulilwa aakwashigwana mboka ya zi po pomahala gawo no ya gandja evi ta shi pitile momalelo gawo gopashigwana opo pu endithwe oopala hoka ta ku patelwa oongodhi dholusheno ndhoka tadhi mangele kumwe oshitopolwa sha Caprivi kondjandjo yolusheno ya Namibia.Iilonga mbika yokumangela kumwe oCaprivi kiilonga yolusheno yaNamibia ogo omukalo gumwe gwa Nampower oku kala ta vulu oku gandja olusheno koshilongo, nopwaana mbudhi.Pethimbo ndika ehangano lyomalusheno lya South Africa Eskom olya shonopeke okulanditha olusheno kiilongo yopuushiinda naashika osha eta opo pu kale olusheno inaalu gwana omathimbo gamwe moNamibia.Nampower okwa ningi omalongekidho ngaashi ndika lya Caprivi opo a shonopeke eikwatelelo lye koEskom.Nampower okwa ningi woo omauvathano niilongo iikwawo yopuushiinda opo a lande olusheno hoka. Ehangano ota li thaneke woo oku manitha itaasi iipe yokudhiga olusheno noshowo iilonga iipe yokulonga olusheno, kakele ko ku wilika egandjo lyolusheno okushonopeka elongitho unene tuu pethimbo lyompumbwe ya londa pombanda yolusheno.Nampower ota longo woo pamwe noshitopolwa shopaumwene melongopo lyolusheno.Sho a popi kombinga yiilonga yetungo lyoongodhi dhokumangela oCaprivi kondjandjo yolusheno yopashigwana omukuluntu gwa Nampower, Paulinus Shilamba okwa ti kakele ko ku mangela oshitopolwa shika kondjandjo yopashigwana, oongodhi ndhika ota dhi mangele woo kumwe iilonga yomalusheno yiilongo yili kumwe muumbugantu waAfrika ya tseyikwa nawa SAPP.Shilamba okwa ti ekwatelokumwe ndika ota li gandja woo engungumano megandjo lyolusheno, na ota yi gandja woo ondjila ontiyali okweenditha olusheno okuziilila kiilongo ngaashi Zimbabwe na Botswana.Sigo oompaka aakwashigwana 735 moKavango no Caprivi oya pewa iimaliwa koNampower molwaashoka pomahala gawo opo pwa enda oongodhi ndhika. Iimaliwa mbyoka ya gandjwa oyi li oodola oomiliona 6.05 dhaNamibia.Shilamba okwa ti omauvathano oga ningwa nale pamwe naayehe mboka ya gumwa koongodhi ndhika na, ayehe ota ya pewa oshimaliwa molwaashoka ota ya ka inyengithwa noku kuthwa po pomahala gawo.Aakwashigwana ayehe oya li ya kundathanwa nayo sha pitile momalelo lya Kavango, Otjozondjupa na Caprivi, noshowo aanafaalama, aanamikunda noohandimwe oya li ya popiwa nayo kombinga yetungopo lyiilonga mbika.Omalelo gopamithigululwa kalo nago oga li ga kundathanwa nago oku sa oshimpwiyu kutya evi lya gwana olya gandjwa opo pu endithwe oongodhi ndhika noopaala dha dho.Ehangano olya gandja oodola 10 000 komalelo ge li gatano gopamithigululwakalo opo giikwathele mewiliko metitatu.Sho iilonga mbika yu uka moshikako shahugunina shooperesenda 30 dha hupa ko, osha simana natango oku popya naakwashigwana oku ulika kutya yo oye li ya simana mehumokemoho nomewiliko lyiilonga mbika.Uuministeli womapangelo giilando nokomikunda owa li wiipyakidhila noku thaneka etungo lyoshilando sha Divundu moKavango. Ndele mpoka tapa tungwa oshilando shika opo wo pe na okweenda oongodhi dhekwatathano lyaCaprivi. Shika osha pumbwa oonkundathana, oshoka okukonga ondjila yilwe mpoka ta pa ende oongodhi ndhika ota shi pula ehangano oomwedhi hamano, ndhoka itaadhi vulu okuziminwa okushitalela muudhano wekopi lyuuyuini mboka wu liko muJuni 2010.Shilamba okwa ti ekateko ndika ota li ka pula Namibia oshindji ta shi vulika pu ka tulwe shoka hashi ithanwa oku ekelahi uudhigu, kutya ngaaka pomahala gamwe nomathimbo gamwe olusheno ota lu kakala lwaahepo, molwaashoka ompumbwe oyindji oku yeleka negandjo lyolusheno.Etulo miilonga lyoongodhi ndhika olya li lya undulilwa komeho sigo oJanuali 2010 na olya hedhi thwako ishewe sigo o Apilili 2010.Oonkundathana odhi li metifa pamwe nepangelo lyoshitopolwa sha Kavango opo pu adhike etsokumwe, mwa kwatelwa ethanekululo lyoshilando shika, Shilamba ta ti sho a ulike ompumbwe opo epangelo li ye mo moshinima shika. Okwa gwedha ko ta ti Nampower okwa ulike kutya okwi ilongekidha okufutila ethanekululo.Shilamba okwa ti iilonga yokutunga ekwatathano lya Caprivi oya kuta aantu 950 ooperesenda 85 dhaambaka aaNamibia. Pethimbo lyiilonga mbika oomvula mbali dha yi etungo olya longitha ootona odhindji dhosamende, iitenda oyindji, okaungulita okendji noongodhi odhindji.Nampower opo lwotango taka longitha okweenditha olusheno paku longitha shoka ha shi ithanwa High Voltage Direct Current.