Oshigongiilonga mOngwediva shi na sha nOmalaria

OSHIGONGIILONGA shi na sha nomukithi omudhipagi gwOmalaria, osha tamekele ohela mOngwediva mOshitopolwa sha Shana moka Aanashilonga oonakutseya nawa omukithi gwOmalaria ya za kIitopolwa ayihe ya Namibia, unene tuu mbyoka hayi kala yi na omalaria ogendji, ya gongala taya kundathana nkene omalaria ge na okukondjithwa nokukondololwa mokati koshigwana moka.

Oshigongiionga shika, sha egululwa pambelewa kOmuwiliki gwUuhaku moshitopolwa sha Shana, Omundohotola Naftali Hamata ongula yohela mOshinyanga sha Sam Nujoma mOngwediva.
Otashi ka tsa omukumo etokolo lyOprograma yOpashigwana yi na sha nEkondololo lyOmalaria, kutya kukayiwe mokati koshigwana mIitopolwa mbyoka yishiwike nawa iitopolwa yOmalaria nokukaningwe omapekaapeko gowina kombinga yekondololo lyOmalaria mokati koshigwana nkene tali ende.
Hamata ta ti kutya otaku katalika kutya ohaku pombelwa tuu nawa shili omagumbo nosho tuu, nelalakano lyokudhipaga oomwe ndhoka odho hadhi eta omukithi gwOmalaria moshigwana. Omu na tuu shili oonete dhoomwe, ndhoka dha tulwa omiti dhokudhipaga oomwe naandhoka inadhi tulwa omiti.
Okutala kutya oonete dholudhi ndoka, odha pewa tuu shili mboka ye na okudhi pewa, ngashi uunona mboka wu li kohi yoomvula ntano nenge wu na oovula ntano noshowo oomeme mboka ye li momategelelo.
Kutya omagumbo ga ngapi ga talelwa po nenge ge na okutalelwa po kwaamboka yomOprogarama yokugandja omiti dhokwikelela kokulika koomwe nokukwatwakOmalaria momikunda moka noshowo okukonaakona oyindji tayi vulu okukwatitha omuntu komukithi gwomalaria ngele inayi ungaungiwa nayo manga pepi.
Ashihe shoka shi na tokuningwa opo, Hamata ta ti, okulongwe oshimati sha pama moshinima shokuugaunga, okupanga nokukondolola omukithi nguka omudhipagi gwa Malaria.
Ta ti uuyelele nee mboka tau ka za momapekaapeko moka, otau ka longithwa mekondjitho, mepango nomekondololo lyomukithi nguka gwa malaria, nelalakano lyoku gu vudha mo thiluthilu mokati koshigwana sha Namibia.