ONKUNDANA ye tu zilila mOmbelewa yoSwapo moshitopolwa sha Shikoto otayi ti kutya ngula mOlyomakaya mOshomeya sha Namutumba na Shikoto,otamu ka kala oshigongi oshinene shOswapo, tashi ka popithwa kOmupresidende gwOswapo Omusimanekwa Hifikepunye Pohamba, ngoka wo e li Omupresidende gwa Namibia.
Otwa kundana kutya Omupresidende Pohamba okuza nena mEtitano ota kala e li moNooli metalelopo lye ongOmuleli gwOshilongo nOmupresidende gwongundu yo Swapo.Inaku tseyithwa naanaa kutya oshike sha ithanitha oshigongi shika oshinene sho Swapo kOshomeya, noonzo otadhi ti kutya otashi vulika Omupresidende gwo Swapo taka popya sha sha pamba ongundu ye yoSwapo, unene tuu sho kwa thindiwa momahogololo pehulilo lyomvula ndjika.Omuunganeki gwoSwapo mOshitopolwa sha Shikoto oye Armas Amukwiyu, na ngashi shito, naye wo otashi vulika taka popya sha kiilyo nokaayambidhidhi yongundu yawo yo Swapo moshigongi moka.Oonzo dhimwe odhe tu lombwela wo kutya Omupresidende Pohamba, otashi vulika a ka talele po wo Omukwaniilwa gwOndonga tatekulu Immanuel Kauluma Elifas pUuwa we pOnamungundo mOndonga molweendo lwesiku lyonena mEtitano. Omathimbo ga zi ko, Omupresidende Pohamba okwa li a talele po Uuwa wOndonga nelalakano okutala nkene wu li kohi yomeya. Otashi vulika nee nena taka tala kutya onkalo yomeya mUuwa oyi li ngiini na oshike sha pumbwa okuningwa po.
Stay informed with The Namibian – your source for credible journalism. Get in-depth reporting and opinions for
only N$85 a month. Invest in journalism, invest in democracy –
Subscribe Now!
