Oshigongi shoRDP mOshakati ngula

ONGUNDU yOpolotika yo Rally for Democracy and Progress (RDP), mOlyomakaya ngaka twa thinda geti 26 Septemba 2009, otayi ka ninga oshigongi mOshakati na Amushanga gwOngundu ndjika yo RDP moShana meme Martha Shikalakuti-Immanuel okwa indila kaawiliki, kiilyo nokaayambidhidhi yOngundu yawo ndjika yo RDP,yi ihumbate nawa oshikuluntu nokwiikelela komikalo adhihe dha nika ehindano, omatukano, omapopyo gaantu nayi, omadhengo omashundulo nosho tuu kukehe shimwe tashi uvitha omuntu nayi.

Meme Shikalakuti-Immanuel, ta gandja wo ekumagidho kaawiliki, kiilyo nokaayambidhidhi yOongundu dhilwe nayo yi ikaleke kokule nomiyonena a tumbula metetekelo, unene tuu mesiku ndyoka lyoshigongi shawo, tashi popithwa kOmupresidende gwo RDP omusamane Hidipo Hamutenya noshowo kaaleli yalwe yopevi yo RDP.Oshigongi shika meme Shikalakuti-Immanuel ta ti, otashi ka tameka pomulongonambali (12H00) gomutenya pOkapale okanene kOmaudhano ka Shakati.’Otandi indile koshigwana ashihe sha Namibia noshowo kOongundu adhihe dhOopolotika kaa dhi hindathane we, ihe dhi idhidhimikilathane nokukala aluhe mombili nonombili nayakwawo. Inatu shekathana we. Inatu dhengathana we. Inatu endululeni we iinima ngashi mbyoka ya ningilwe kOutapi kOshitopolwa sha Musati. Namibia na ulike uukuluntu we neuvoko lye lyiinima oshikuluntu noshowo a ulike kutya Uudemokoli oku wu uvite ko nawa note wu longitha noku wu tula miilonga.