Oshigongi sho Swapo pOhangwena mOlyomakaya

GAVENA yOshitopolwa sha Hangwena omusamane Usko Nghaamwa, ngoka wo e li Kaansela gwOshikandjohogololo sha Hangwena okwa tseyitha kutya mOlyomakaya ngaka twa thinda geti 10 Januari 2009 pOhangwena otapu ka kala oshigongi oshinenenene shoSwapo ya Namibia, tashi ka popithwa kOmupresidende gwoshilongo tatekulu Hifikepunye Pohamba, ngoka wo e li Omupresidende gwOswapo ya Namibia.

Etseyitho ndika okwe li ninga pethimbo lyOshigongi shOswapo pEenhana mOshitopolwa sha Hangwena meti 30 Desemba 2008 nokwa kala te li endulula omathimbo nomathimbo mOradio NBC Oshiwambo.
Gavena Nghaamwa ta lombwele oshigwana ashihe shomOshitopolwa she sha Hangwena noshopuushiinda shi ye koshigongi shoka oshinenene nosha simana mondjokonona ya Namibia. Okwa hiya wo oombushe miilonga yokiitopolwa ayihe yomoNooli noshowo kAaunganeki yo Swapo mIitopolwa moka.
Ta ti naye ye ye mu popile.Osho oshigongi oshinene shotango shOswapo tashi ningwa momumvo nguka 2009, konima yomasiku omulongo sho gwa tameke.
Gavena Nghaamwa ina popya kutya Omupresidende gwoshilongo tatekulu Pohamba otaka gandja etumwalaka lya shike, ashike okwa ti kutya otaka gandja etumwalaka lya simana koshigwana ashihe sha Namibia pethimbo ndika lyetameko lyomumvo omupe 2009.
Gavena Nghaamwa ta ti kutya oshigongi shika otashi ka tameka lwopombali yomutenya noshigwana osha tegelelwa shi kale tashi ende tashi thiki kuyele manga ombali yomutenya inayi thika.