Oshigongi shelongitho nawa lyevi she egululwa moVenduka

KONYALA etata lyevi lyomapya muAfrica otashi vulika ita li ka longithwa okuya pomumvo 2050, ngele okulonga hoka taku nayi pike evi nomukalo nguka gu lipo ngashingeyi otagu tsikile.

Shika ota shi vulu wo okuningwa ngele ita pa katukwa oonkatu opo elongitho nayi lyevi li yi we moshipala.Ominista yOmudhingoloko nOmapashiono me Netumbo Nandi Ndaitwah sho a egulula oshigongi shi na sha nelongitho lyevi nawa, okwa londodha kutya shika ota shi ka kala shina oshilanduli oshiwinayi kombinga yelongo lyiikulya, negameno lyiikulya.Nandi Ndaitwa okwa egulula oshigongi shomasiku gane ta shi kundathana elongitho nawa lyevi noshowo nkene elongitho lyevi ndyoka ta li wilikwa.Okwa ti molwaashoka evi ota li longithwa nayi nolya yonuka shika osha eta kutya momapya ita mu zi we iikulya ya gwana muumbugantu wAfrika, na shika ota shi tula moshiponga elongitho lyevi moshitopolwa shenenevi Afrika.Onkalo ndjika oyi na woo enwethemo ewinayi lyopankalathano unene kaakiintu mboka oyo haya longekidha iikulya, molwaashoka oha ya kala nokwiipula shoka ta ya telekele aanegumbo lyawo uuna ndoka miigandhi ta mu pu iikulya oshoka eteyo ka lya li olindji.Nandi Ndaitwa okwa ti nando uuyuni owu kale wu na iimaliwa oyindji, mbika ita yi vulu okulanda iikulya ngele ka pe na mpoka pwa longwa iikulya.’Oshiwanawa oku kala noshimaliwa ndele ito vulu okulanda iikulya kombaanga, nongele iikulya oya longwa iishona nena shika ota shi kala shi na oshilanduli oshiwinayi.’ Nandi Ndaitwah tati. Okwa ti miitopolwa yimwe yaNamibia aakwashigwana yamwe otaya kondjele uulithilo na shika ota shi vulika shi kale oshizemo shelunduluko mombepo yuuyuni.Elongitho nawa lyevi nepangelo lyalyo nenge okwaa kala po kwalyo oshi na enwethemo kombili nengungumano miilongo.Aakalelipo oma 300 ota ya kundathana omilandu omiwanawa dhokulongitha evi, iiholelwa iiwanawa yewiliko melongitho nawa lyevi muAfrica, nonkene ta shi endwa opo onkalo yaalongi yevi lyokomikunda yi
hwepopekwe.