Oshigongi oshinene sho RDP mOhangwena

ONKUNDANA ya za kOmuunganeki Omukuluntu gwo RDP mOshitopolwa sha Hangwena, ano ku tate Timotheus Shikongo otayi ti kutya Ongundu yOpolotika yo RDP otayi ka kala nOshigongi oshinenenene pOhangwena mOlyomakaya ngaka twa thinda geti 2 Mei 2009.

Omusamane Shikongo ta ti kutya Oshigongi shika sho RDP otashi ka kalwa kAawiliki, kiilyo nokayaambidhidhi oyendjiyendji ya za kIitopolwa ayihe ya Namibia.Omupopi omunene pOshigongi mpoka otaka ka kala Omupresidende gwoRDP omusamane Hidipo Hamutenya, ta yambidhidhwa kAawiliki yalwe aakuluntu moRDP ngashi, Ootate Jeremia Nambinga, Kandi Nehova, Jesaya Nyamu, ooBezuidenhout, ootate Ismael Shailemo nayakwawo wo oyendji.
Tate Shikongo ta ti kutya oya li ye na okukala nEyotho lyonyama lya kwata miiti okuza mEtitano lyeti 1 Mei 2009, ashike molwashoka esiku ndyoka lyEtitano pOhangwena mpoka otapu ka kala oshigongi oshinene shokudhimbulukwa Esiku lyAaniilonga, tashi ka popithwa kOmupresidende gwoshilongo Hifikepunye Pohamba, oya kaleka eyotho lyonyama ongula nomutenya gwEtitano ndjoka, oshoka oya hala okusimaneka ekalopo lyOmupresidende pOhangwena mpoka noshowo Esiku ndyoka lyaaniilonga.
Eyotho lyonyama otali ka tameka komatango lela gEtitano ndyoka, konima sho oshigongi shAaniilonga sha pwa nOmupresidende a shuna nale kegumbo nokuli. ‘Tse yo RDP otwa simaneka aaleli yoshilongo shetu, na inatu hala pu kale ishewe Oondaanisa dhOobraai manga pehala mpoka pu na Omuleli gwoshilongo Omupresidende gwetu Hifikepunye Pohamba, ta popitha oshigwana she,’ Shikongo ta popi ngawo metumwalaka lye ndyoka a gandja koshigwana okupitila mOradio NBC Oshiwambo ongula yohela.
Tate Shikongo ta ti, Eyotho lyonyama lyawo ndyoka otali ka tameka komatango gEtitano ndjoka twa thinda konima ashike sho Omupresidende a mana okupopitha oshigwana she pOhangwena mpoka.
Shikongo ta indile kiilyo nokaayambidhidhi yoRDP nayo ya ye kOshigongi shoka shedhimbuluko lyEsiku lyaaniilonga nokukapulakena ketumwalaka lyOmupresidende tatekulu Hifikepunye Pohamba, ngoka ta ka kala omupopi omunene pOshiithanene shoka shAaniilonga mEtitano pOhangwena mpoka.
Shi na sha noshigongi sho RDP mOlyomakaya pOhangwena mpoka, omusamane Shikongo okwa indila kiilyo nokaayambidhidhi yoRDP kutya inayi ya koshigongi hoka niilwitho, ngashi oombele nomikonda, oshoka oku na nale egameno lya gwana lyOpolisi ya Namibia ndjoka ya lombwela nale oshigongi shika oshinene shomOlyomakaya sho RDP, noyi shi shi wo nale nawanawa nokuli.