Oshigongi oshinene shElongo moshitopolwa sha Shana; Shinyemba ta ti

OMUWILIKI gwElongo mOshitopolwa sha Shana me, Dute Shinyemba okwa tseyitha kutya mOshitopolwa sha Shana otamu ka ningwa oshigongi oshinene shi na sha nElongo, tashi ka ningilwa mOsenda yOmaulikilo gIikwaipindi ya Ngwediva mOngwediva okuza eti 25 sigo 26 Februari 2010, ano okuza Etine nEtitano lyOshiwike tashi ya.

Mee Shinyemba ta ti Otema yOshigongi shika otayi ka kala; Aalongisikola yIitula mo mElongo omolu iizemo yElongo yi li nawa’. Ta ti wo kutya okwa tegelelwa aakuthimbinga moshigongi shika ye li pomathele gatatu (300) lwaampoka. Shinyemba ta gwedha po ta ti kutya elalakano lyoshigongi okugwanitha po shoka sha halika kEpangelo shOkuhumitha komeho Ooprograma dhElongo nodhOmadheulo (ETSIP) ndhoka tadhi lalakanene Elongo lya kola, lyOngushu, lyiihwapo, lyUudemokoli nolyaaluhe. Omalalakano ngoka taga vulu ashike okwaadhika uuna kehe gumwe e na oshitopolwa mElongo, mwa kwatelwa naanangeshefa, taa kala yi itula mo shili noonkondo.Omalalakano nee omanene gOshigongi oshinene shika, meme Shinyemba ta ti, okukonaakona mo nawa iizemo yOgrade 10 no 12 yomomumvo 2009, okutsa omukumo etulopo lyElongo lyOngushu nomikalo dhokulonga momumvo 2010 sigo 2012, okutula po Elongo lya kola noompito odhindji tadhi vulu okulongithwa kaailongi ayehe, okukoleka aalongisikola ya kale ya nkondopala nawa miilonga yawo, okuhwepopaleka omaihumbato nevuliko nawa lyaanasikola pOosikola dhawo noshowo nee okutsa aavali naakuluntu yaanona omukumo, ayehe yi itule mo meilongo lyaanona yawo. Kehe nee ngoka wa hala uuyelele wiihwapo kombinga yoshigongi shika oto vulu okupula tate Butty Salom ko 0812224183, meme Helena Perestrelo ko 0811290006, tate Williams Newaka konomola 0812485645 nenge meme Bernadette Mukulu Mojekwu konomola ye 0811282686. Amuhe nee mboka mwa hiywa koshigongi shika, meme Shinyemba, ote mu indile mu holoke koshigongi sheni shika, oshoka osha simana unene molu onakuyiwa yElongo mOshitopolwa sheni sha Shana nomoshilongo ashihe.