Oshigong shelongo shopashighwana sha tameke Omaandaha moVenduka

OSHIGONGI shopashigwana shelongo osha tameke Omaandaha mOvenduka, nokonyala aakalelipo yoshigwana nayalwe yeli pokati komathele 600 sigo 900 oye li moshigongi shika.

Aakalelipo mbaka pahapu dhAmushangatakalele gwElongo oya za momahangano goshigwana, miikondo yayooloka ya holomende noshowo moongundu dha yooloka. Aayikoshigongi oya li ya ningi omalongekidho gomaishangitho pehulilo shiwike. Oshigongi shika osho shotango moshilongo osha tengenekwa shika longithe pokati koodola oomiliona 6 sigo 7, nomwaalu omunene gwiimaliwa mbika ota gu ka futwa aatoloki mboka taya ka fatululila aayi koshigongi momalaka gawo, opo kehe gumwe a kale ena ompito oku gandja ethaneko lye melaka ndyoka ye uuvite epu kuye. Pethimbo lyoshigongi amushangatakalele mUuministeli wElongo, Alfred Ilukena ota kala nokugandja uuyelele kombinga yaashoka sha ndjambulwapo esiku ndyoka, nUuministeli we owa thaneka oku tuma oshigongi shika mombepo pethimbo tashi ningwa oku pitila momakuthikuthi goTeevee yiilonga yokutuma omawi mombepo ya NBC oshiwike shika ashihe.Ilukena okwa ti mboka ya li ina ya mona ompito okwiishangitha opo ya ye moshigongi oyena ompito oku gandja omathaneko gawo pamikalo dhilwe dhoshinanena. Okwa ti oshigongi oshina elalakano lyoku taamba omathaneko ogendji ngaashi tashi vulika.Ogendji agehe otaga ka taambwa noku konakonwa pu talike nkene ngaka taga kwathele oku hwepopeka onkalo yelongo moshilongo. Okwa ti omathaneko gamwe ngoka taga zi moshigongi otaga ka tulwa miilonga mbala omanga omakwawo ota ga ka kwata ethimbo okutula miilonga. Ilukena okwa li a ekelehi omupopyo gwa RDP ngoka a ti oshigongi shika aniwa osho Swapo ndele kashi shi shoshigwana ashihe. Okwa ti aawiliki yoongundu dhopolitika nayo oya li ya tuminwa ehiyo. Okwa ti ishewe elongo olyo oshinima shomu Namibia kehe ngoka a hala oku tya sha kulyo onkene kehe gumwe okwa tegelelwa oku ninga sha kombinga yonakuyiwa yelongo.Etameko ota li ningwa sho Omuprofesori, Joseph Diescho ta popi kombinga yelongo komeho nokonima yemanguluko, nguka ota ka landulwa komutotipo gwelongo lyokonima yemanguluko, Omuprima Minista, Nahas Angula.