Oshidhindi shomeya gefuta oshi na okutungwa mbala

IITOPOLWA yokomunkulofuta ota yi ka sa enota ngele oshidhinditho shomeya gefuta inashi ya miilonga momumvo 2013.Namwater okwa thaneka okutungapo oshidhindi shika pehala ha li ithanwa mile 6.

Ehangano ndika olya londodha kutya ngele shika inashi ningwa nena ota li ka thiminikwa oku hulitha po oku gandja omeya koomina nokoofabulika dhoohi, noshowo ashike okugandja omeya omashona gowala koomuni yiilando yokomunkulofuta noshigwana shomiilando mbyoka.Omukuluntu gwiilonga yuunginiya omusamane Kuiri Tjipangandjara okwa ti oya pumbwa okulonga neendelelo opo ya tunge oshidhindi shika mbala ngaashi ta shi vulika.Etokolo lya tokelwa ota li kala noshilanduli kaashi shi okudhiladhilwa. Ngele pamwe otwa mono ekanitho ndyoka ta li kala po nena ngiika ota pu kala eendelelo okutunga ehala ndika.Okwa ti oomina odhi na uuwanawa koshitopolwa shika. Nongele odha pata molwaashoka pwaana omeya nena ita pa ka kala ehumokomeho lya sha.Pethimbo ndika Namwater ota pombo omeya ogendji sha pitilila oku za moothithiya dhokohi yevi dha Omdel na Kuiseb. Ehangano olina uuthemba okushininga sigo omumvo 2010. Oothithiya ndhika odhina uuwindji womeya gookubikemeta oomiliona ntano kehe yimwe.Namwater ngashingeyi ota pombo omeya gookumbikemeta dha pitilila pundhika na shika ota shi yonagula oothithiya ndhika.Oku teka mo omeya ngaka ota shi fala ko ku ya mo komeya gomefuta pehala ndika.Ngele shika osha ningwa nena ka pu nawe esiku oothithiya ndhika ta dhi ka gandja omeya.Namwater oha teke omeya gookubimeta oomiliona ntano oku za mothithiya ya Kuiseb. Kumwe omeya agehe haga pombwa momahala ngaka ogo ookubimete oomiliona 14 ngaashi ompumbwe yokomunkulofuta ta yi shi utha pamwe noomina dha Rossing na LangerHeinrich.Onkalo ka yi shi ombwanawa oya pitilila puwinayi. Nongele ina pa ningwa sha Namwater ota ka vula ashike okugandja omeya gookubimeta oomiliona 10.22