Oshakati otashi thanekululwa

OMASIKU ga zi ko mOshakati omwa li mwe ya Oindjinia, ano aathaneki yoondoolopa ya dhengambanda, taya ningi oshigongi oshinene nOmukuluntuwiliki gwIipambele yOmeya gEfundjaErastus Negonga noshowo nOmalelo gOondoolopa, unene tuu ndyoka lya Shakati nokupopya kutya Oshakati oshi na okutungululwa nomeya gefundja oge na okupangelwa naanaa ngashi tashi vulika.

Aaindjinia mbaka, taku tiwa kutya oyEhangano lya Knight Piesold Consultants, taya lombwele oshigongi shoka kutya nonande oyendji taya ti kutya Oshakati osha tungwa miishana yomeya na pamwe nashi ze po, shoka hasho, omeya oge na okupangelwa kaantu pamukalo gwombili ndele taga lombwelwa kutya inage ya mo we mOshakati.
Taya ti kutya opwa thanekwa ku ningwe ekuma lya za pombanda ya Katana mpoka ndele tali piti kombinga yuuningininolela wa Shakati, ano koongamba dhOshakati nomikunda ndhoka dhi li muuninginino washo ndele tali yi lwokEempundja hoka, lyo limwe tali piti kombinga yuuzilo wa Shakati okuza tuu pombanda ya Katana, ano moNooli ya Katana hoka ndele tali ka tsakanena nekwawo lwokOmpundja lwaahoka.
Omeya nee okuzilila moNooli ya Katana, otage ya tagi idhenge mekuma moka notaga lambalala ashike ekuma ndyoka kombinga yuuninginino wa Shakati noshowo kombinga yuuzilo wa Shakati ga thinda kombuga hoka.
Moshana shoka sha za kOkatana she ya mOshakati otamu tungwa omukanka omunene moka tamu kala tamu ende omeya ga kondololwa nawa, tagu piti pontopa ya Sikai mpoka gwa thinda kombuga, go gumwe tagu fulwa okuza monooli ya katana gwa lambalala nenge gu li moshana sha Katana shoka sha kunkula nOnawa, tagu piti montopa ya Kandjengedi gwa thinda nago kombuga hoka, Omalukanda ngashi Oneshila, Kandjengedi, Evululuko, Oshoopala, Sikai nEemwandi otaga ka lundululwa po naantu otaya ka tulululwa kEkuku
popepi nOfaabulika yOnyama, hoka ku na ngashiingeyi Osenda nenge Oosenda dhoonakuhepekwa komeya gefundja, haku ithanwa okOsenda ya Shoopala noshowo muuninginino wa Shakati nokombinga ndjoka yEhenye.
Mooha dhondjila onene ya taakana mOshakati ya pita mOneshila nomu Kandjengedi, otamu ka tungwa Oosikola oonene n omeya otaga kala taga kondololwa nawa nomikanka moka. Oshitopolwa sha kandjengedi noshowo shoka sha Golfa moNooli ya Kandjengedi, omwa thanekwa tamu ka tungwa omagumbo gaanenentu, ano gomakenge, gaaniimaliwa. Okuza pontopa ya Sikai wa uka lwomoshana shoka shi li moNooli ya Sikai, otamu ka tungwa Opaaka onene yomavululukilo, ndjoka mokati kawo mwa pita omukanka gwa fa omulonga.
Mooha dhEpandaanda enene lya Shakati okuza tuu pontopa ya Kandjengedi sigo okontopa ya tate Mbulu lwaahoka, otamu kala mwa tungwqa Omafilisa omanene nomale goopala nawa.
Omatala ga Shakati gonganshiingeyi, otaga ka za po notaga tungwa nawa nogoopala mpoka pwa li okalukanda komataiyela, yamwe ohaya ti pogolfa kwali. Oko wo taku ka kala ehala enene lya longekidhwa nawa lyoombesa nOotekisa. Muumbugantu wa Unam mOshakati okuza mpoka pu na omatale gohanya ngashiingyi wa thinda mOnendongo moka nomOkakukiipupu, otamu ka tungwa Oofaabulika onene.
Osasiona onene yEshina lyokolutenda oko wo tayi ka kala kombinga ndjoka okuza kOndangwa. Okapale okanene koondhila nako oko taka kala ka gama lwaahoka. Omathaneko ngaka niiloonga mbika, otayi ka longwa paikako sigo tayi pu. Tashi vulika yi ka kwate noomvula ethele tayi longwa.
Ashike oya ti kutya edtembudho lyomalukanda nekondololo lyomeya gefundja oshinima sha endelela noshi na okulongwa mo meendelelo ngashi tashi vulika, ko taku landula yilwe yomomathaneko ga tumbulwa metetekelo.
Aanashigongi oya li ya ulikilwa omathano gondoolopa ya Shakati ngashi tayi ka kala konima yoomvula ethele nasha noshe yi tala ko yoopala nawa shili, omuntu wa hala ashike kutya ngeno otashi ningwa nena nenge ngula.