Oseko ya Nehale oya pumbwa eyambidhidho

OSEKO yOpombanda ya Nehale tayi adhika mOnayena mOndonga moshitopolwa sha Shikoto noyi li yimwe yomooseko oonkulu moshitopolwa sha Shikoto nomoshitopolwa ashihe shoka sha kala hashi ithanwa Owambo kwali, otaku hokololwa yi li moluhepo lwomatungo gontumba noshowo iikwaniipangitho yontumba noyongandi yelongo.

Omukuluntusikola gwosikola ndjika tate Elifas Iimene, ota ti omolu oluhepo nduka ye na poseko yawo mpoka, oya longekidha po oshiithanene oshinene sheyopamwe lyaalongwa naalongi aakulu naamboka ye li po poseko mpoka pethimbo ndika, ye ya tale nkene taya kutha oseko yawo kohi yoluhepo nduka nankene ye na okukandula po oompumbwe dhinewe koseko yawo ndjika.Oshiithanene shika, tate Iimene ta ti, otashi ka kala ko nee okuza eti 27 Juli 2012 sigo 28 Juli 2012 poseko ya Nehale mpoka.Kakele kaamboka ya longelwe noya longele poseko ndjika okuza tuu sho ya totelwe po momimvo ndhoka, tate Iimene ota ti kutya oya hiya wo aanenentu, ano aawiliki yopaendondo dhi ili nodhi ili opo yee ya yambidhidhe naashoka ye na po omolu ehumithokomeho lyoseko yawo ndjika. Tate Iimene ta ti, oya hiya wo oministeli yElongo Omundohotola Abraham Iyambo noshowo omupeha gwe Omundohotola David Namwandi, aanambelewa yalwe aakuluntu mepangelo, Omukwaniilwa gwOndonga tatekulu Immanuel Kauluma Elifas nelelo lye lyopamuthigululwakalo, aanangeshefa noshowo aanenentu yalwe moshigwana, opo ayehe mbaka yee ya yambidhidhe oseko yawo ndjika yi li moluhepo. Tate Iimene, ngoka ta indile aahiwa ayehe mbaka ya holoke koshiithanene shawo shika, ota ti kutya omatungo gawo gamwe kage li we kumwe noga pumbwa okuwapalekululwa. Oya pumbwa oshimaliwa shokutunga oshinyanga shIigongi poseko mpoka. Oya pumbwa oshimaliwa shokutunga po ondjugo ompe yomambo noshowo ongulu ya gwedhwa po yOlabora yIikwaunongononi. Iimene ta ti oya pumbwa oshimaliwa shokuwapalekulula omatungo gawo ogendji ngoka ge li monkalo yanaipala pethimbo ndika noshowo oshimaliwa shokulanda iikwaniipangitho yilwe yelongo. ‘Ileni, ileni, ileni yakwetu mu tu kuthe kohulo yegonga lyoompumbwe ndhika poseko yetu mpaka,’ tate Iimene ta ti ngawonesimaneko enene. Oseko ndjika ya Nehale, otaku tiwa kutya oya longa oyendji yomoshigwana, noyendji yomuyo oye li poondondo dhopombanda melelo lyoshilongo noshowo miikondo yi ili noyi ili tayi lelitha Namibia. Onkee nee ayehe mbaka otaya hiywa koshiithanene shawo shika, yee ya yambidhidhi oseko yawo opo yi vule okuya komeho.