Oranjemund masiku ya pewa omuthika gwoshilando

O
RANJEMUND ota shi vulika yi pewe omuthika gwoshilando mbala, ta shi vulika shika shi ningwe nookuli mu Febuluwali omvula ta yiya. Shika osha kolekwa komuwiliki gwoshikandjohogololo sha Oranjemund omusamane Toivo Nambala.

Nambala okwa ti Okabinete oka tokola omathimbo ngaka okutseyitha kutya evi lya tungwa lili meni lyoshinano shookilometa omulongo, momudhingoloko gwa Oranjemund noshowo ondjila ndjoka ya za koRosh Pinah oyi na okuninga oshitopolwa shoshilando.Nambala okwa ti Okabinete oka tokola ka kuthemo evi lyoshilando noshowo oondjila molincensa yokumina ya Namdeb opo shi endeleleke eigidho kutya Oranjemund osho oshilando.Omathaneko okuninga Oranjemund oshilando oga katekwa komapulo gopampango kombinga yomaliko ngoka Namdeb ena okugandja kepangelo lyoshilando.Omugandjimulombo gwa Namdeb, Hilifa Mbako okwa koleke kutya ethaneko okuninga Oranjemund oshilando ota li yi nawa komeho mokugandja omaliko miikaha yelelo lyoshilando shoshene.’Tse otwa nyolele epangelo kutya otwa nyanyukwa kombinga yelongekidho lyokuninga Oranjemund oshilando, na otwii ilongekidha okulongela kumwe nepangelo mokulandula ondjila ndjoka ta yi endwa nayo okuninga ehala ndika oshilando ta shi ipangele shoshene.Mbako okwa ti opena omautho gamwe mompango yokawe ngoka ge na oku gwanithwa po omanga ehala ndika inaali ninga oshilando.Epangelo oli na oku pulakena kombinga yegameno lyoonzo dhehangano noshowo nkene omaliko gaNamdeb taga taambathanwa oku za kehangano okuya kelelo lyoshilando.Mbako ka li iilongekidha okutya sha kombinga yongushu yomaliko gaNamdeb. ‘Otu na ontseyo kutya omaliko, ongushu yago oyi thike peni ndele pethimbo ndika ita tu shi popi manga.’ osho a ti ngaaka.Aakalimo oyendji yomOranjemund oya indile epangelo li endeleleke okuninga ehala ndika oshilando molwaashoka oye na uumbanda oshilando shika shomina otashi ka ninga ehala lyiiluli, okuza tuu sho aaniilonga oyendji yeshithigipo omolwa omahupilo guuyuni ngoka ga nkundipike elongo lyokawe.Namdeb okwa li a thiminikwa kushika opo a laleke oyendji yaaniilonga ye .Oranjemund osho oshilando hashi lelwa kehangano lyaNamdeb lyolyene, omayakulo gopashilando ngaashi omeya , olusheno, iiyagaya nayilwe ayihe ohayi longwa kehangano, nolundji aakalimo yomomagumbo moshilando shika iha ya futile iilonga yakulo mbika.Ihe uuna oshilando sha pewa omuthika gwokwiilela nena, aakalimo ota ya ka futila omayakulo gopamuni ngaashi naanaa hashi ningwa miilando yilwe. Aakalimo ota ya kala woo ye na uuthemba okulanda po omagumbo moka ye li mo.Ngashingeyi omagumbo ogendji moshilando shoka ogehangano lya Namdeb.