Oquorum moshigongi shopashigwana itayi lunduluka

OSHIGONGI shopashigwana osha manitha oonkundathana dha sho oshiwike sha yi, kombinga yethaneko opo pu lundululwe omwaalu gwaatotimpango mboka ye na okukala megumbo opo li vule okutsikila niilonga yalyo ethimbo lyomutumba.

Egumbo olya tokola kutya omwaalu gwaatotimpango 37 natango otagu kala miilonga sigo oompaka.Minista yonale Yoonakulwa Aakulu, Ngarikutuke Tjiriange okwa li atula ethaneko ndika komeho gegumbo tati osha pumbiwa omwaalu nguka gu lunduluke oshoka ohagu yonagula oonkundathana megumbo, nuunandoka pwaana ompumbwe yokuhogolola ngele ta pa ningwa etokolo.Omvula ya ziko omupopi gwoshigongi shopashigwana , Theo Ben Gurirab okwa tumu aatotimpango komagumbo iikando oyindji oshoka egumbo kalya li li na omwaalu gwa gwana okutsikila noonkundathana. Shika osha kala tashi ningwa molwaashoka oyendji yomaatotimpango oha ya iyaka po piilonga unene tuu konima yefudho lyotee.Oshinima shika osha li sha ningi esitha honi ku uamushanga gwegumbo.Moshipopiwa she shokulaleka omanga inaa ya moshipundi shevululuko, Tjiriange okwa dhimbulutha egumbo kutya na li dhiladhile kombinga yi yetwapo ayihe kethaneko lye.Methaneko lye Tjiriange okwa li a pula egumbo opo li tule po shoka hashi ithanwa oquoruma yiilonga, ando ta yi kala ashike yina aatotimpango yeli omulongo naya tano pehala lyomilongo ndatu naya heyali..Oshigongi shopashigwana oshina iilyo omilongo 72 mbyoka yina uuthemba wokuninga etokolo, kwa gwedhwa iilyo ihamano mbyoka ihayi ningi omatokolo gasha.Iilyo yili 37 mbyoka yina oonkondo dhetokolo pamwe naambyoka yaana uuthemba wetokolo otayi eta po oquorum kokutya egumbo ota li kala li na uuthemba okutsikila noonkundathana. Iilyo yegumbo mbyoka yili iilyo yokabinete naapevi yawo olundji ohaya kala miilonga yopambelewa pondje yoshilando naashika ohashi ningitha opo pwaakale oquoruma.