Oprojeka ya Ndonga Linena ya tameke iilonga

OMUPERESIDENDE Hifikepunje Pohamba okwa egulula oprojeka yuunamapya ya Ndonga Linena oshiwike sha yi. Oprojeka ndjika oyi li ookilometa 80 kuuzilo wa Rundu.

Oya li yi na okutameka iilonga yawo oomvula hamano dha ziko na oya li ya opalekwa iihwa momumvo 2003, noshowo oya tungilwa ehala lyokupomba omeya.Iilonga ayihe pehala mpoka oya li ya thikamekwa oshoka ka pwa li pwa monika ngoka ta kala taga gandja omayakulo kwaamboka taya longo po projeka ndjika.Omuperesidende Pohamba okwa zimine kutya osho shili, iilonga yoku manitha oprojeka ndjika oya kwa ta ethimbo ele, oku tula miilonga nonando elelo lyopamuthigululwakalo lya Gciriku olya gandja evi ndika ethimbo ele lya piti po.Ndjika oyo yimwe yo mooprojeka dhuunamapya dha hogololwa kepangelo dhihumithwe komeho melalakano lyoshilongo shi longe iikulya ya gwana meni lyoshilongo.Omuleli gwoshilongo okwa ti oprojeka ndjika ota yi ka shonopeka eikwatelelo keetemo lyiikulya oku za kiilongo yilwe pondje.Okwa ti ooprojeka dhuunamapya adhihe kumwe 11 ota dhi ulike eitulemo melalakano ndika lyokulonga iipalutha ya gwana moshilongo.Omupevi Minista gUunamapya, Isak Katali okwa ti iimaliwa ayihe mbyoka ya longithwa miilonga mbika kepangelo oyo oodola oomiliona 71,5, omiliona yimwe oya longithwa okufuta ooyene yomapya mboka ya lundululwa mpoka.Oomiliona 49 odha longithwa mokukokola ehala ndika, noshowo mokutunga oshitaasi shokupomba omeya, nominino dhokufala omeya komapya agehe gopoprojeka ndjika.Omuleli gwaGciriku omukwaniilwa, Kasian Shiyambi okwa taambako oprojeka ndjika oshoka ota yi gandja iilonga.Poprojeka opuna omagumbo, moka tamu kala aanamapya aashona ye li 29 na oprojeka oyi na woo ehala lyokutekela iikunomwa.Omunangeshefa gwomoshitopolwa gwedhina Shikunino Trading Enterprise oye ta gandja omayakulo komapya goohectara 800.Ngashingeyi moshitopolwa shaKavango omuna ooprojeka dhuunamapya dhi hamano. Ndhika odho Shadikongoro, Shitemo, Mashare, Uvhungu Vhungu na Musese.