Opomba yomahooli ita yi longo nawa ya etitha oshiponga shondhila

UUPYAKADHI wu na sha nopomba yomahooli owo wa ulikwa wa etithile oshiponga shegwo lyondhila mombanda, moka mwa li mwa ehamekelwa aakwashigwana ya France yaali aaAmerica yaali momuhingi ndhila moVenduka omumvo gwa yi.

Ehokololo lya nyolwa konima yomakonakono okutala kutya oshiponga shika osha etwa koshike sho ondhila yoludhi lwo Cesna 210 ndjoka ya li ya humbata aantu yatano ya gwile pevi konima ashike sho ya tuka pokapale ka Eros, ogwa tseyithwa kUuministeli Wiilonga.Pahokololo lya ngongwa po komuwiliki ena sha niiponga yoondhila, omusamane Ericksson Nengola, olya ti uupyakadhi wu na sha nopomba yomahooli owo wa eta ondhila ndjika yimone oshiponga.Esiku ndyoka aatalelipo yane nomuhingi ndhila gumwe oya li ye na okutuka okuza poEros okuya koMokuti Lodge popepi nEtosha, sho ondhila yawo yoludhi lwo Cesna 210 ya ongotele pevi konima ashike yokutuka po, poKapale ka Eros. Ondhila ndjika yehangano lyomatukomombepo ga Scenic Air oya li ta yi tuka oku uka pombanda oonkatu 150 nenge 200 sho omuhingindhila a ndhindhilike kutya eshina lyondhila ota li kanitha oonkondo na ondhila kaya li ta yi vulu okutuka yi ye muule. Sho omuhingindhila a mono shika okwa tokola opo a ninge enambelo lyopaulumompumbwe pehala lili popepi nomatungo gaTransNamib Gamma Training centre. Oku za mpoka ondhila oyidhenge momuti gumwe noshowo oya gumu oongodhi dholusheno na oyi indwangula pevi. Omuhingindhila naapashioni yatatu oya ehamekwa kashona omanga omupashioni omutine a ehamekwa shinene.Ondhila ndjika manga inaa yi longithwa okuya koMokuti Lodge oya adhika ashike opo ya konakonwa ngele oyili nawa. Eshina lya yo olya li lya hwamekwa na olya li ta li matuka nawa poondondo adhihe dho ndapo, na ina pa ndhindhilikwa sha kutya eshina olina uupyakadhi andola. Opomba yomahooli na yo oya li ya konakonwa ndele ina pa monika sha.Ndele aakonakoni yoko South Africa oyo ya ka ndhindhilika kutya opomba oyi na epuko ndyoka lya eta opo omahooli ga kale taga pitile pombuthulu mpoka, naashika osha fala sigo oompoka eshina li kanithe oonkondo dhoku fala ondhila pombanda.Eyonuko ndika olyo lya fala sigo oompoka kutya omahooli omashona oga kanithitha oonkondo dheshina no ina li vula we oku undula ondhila yi ye pombanda.