Opolisi yu uvaneke ta yi ka longa nawa

OPOLISI mOkahandja noKaribib oya londodhwa nokwiindilwa yilonge nuudhiginini opo yi kale nokukwata aafuthi yiimuna, mboka taya piyaganeke omudhingoloko dhoofaalama popepi niilando mbika iyali.

Komufala gwopolisi moshitopolwa sha Khomas, Komufala Samuel //Hoebeb okwa lombwele aanafaalama poshigongi po Wilhelmstal kutya oku uvite pamwe naanafaalama sho yu uvitile opolisi nayi, nokwa pula aanafaalama yaa shololithwe kushika, ndele ya tale komeho nokulongela kumwe nopolisi. Okwa ti peha lyawo ya tale komandopo ngoka ga li po oya pumbwa okutala komeho mokulongela kumwe nopolisi. Okwa tseyitha ondungedhiladhilo yoomwedhi hamano yoku kondjitha iimbuluma ndjoka ya tameke nale moVenduka no ta yi ka andjaganekelwa komahala galwe moKhomas noshowo oshilongo ashihe. Okwa ti aanambelewa yopolisi yagwedhwapo ota ya ka tuminwa kOkahandja noKaribib opo ya kwthele mengambeko lyiimbuluma. Komufala gwopevi gwopolisi, Andreas Nelumbu okwa tseyithile aanafaalama kutya opolisi yomoKhomas naandjoka yomEronngo otaya longele kumwe oku keelela uufuthi wiimuna niithitukuti moofaalama. Okwa ti ongundu ye oyi ilongekidha okutsakanena momwedhi nenge moshikako pamwe naanafaalama, ndele okwa ti osha simana opo aaniimuna ya lopote omaupyakadhi kehe kuye nenge kaapolisi ooyakwawo. Okwa ti ina ya pumbwa okukala yena uuyelele andola wiihwapo , shampa ashike yena uuyelele wontumba nena opolisi ota yi vulu okutsikila nekonakono. Komufala //Hoebeb okwa uvaneke kutya opolisi ita yi kiidhidhimikala mboka yeli mopolisi itaa ya longo iilonga yawo, noshowo ita yi kiidhidhimikila omaipopilo taga zi kaanambelewa yopolisi. Okwa kumike aanafaalama ya dhengele opolisi, nokwa indile aapolisi mboka ya li poshigongi ya gandje oongodhi dhawo kaanafaalama. Okwa ti ngashingeyi sho mbaka yena oonomola dhaapolisi otaya vulu okudhengela aapolisi mbala. Okwa zimine kutya aapolisi pomainda gopolisi oyena oku longa nawa. Naamboka inaa ya hala okwiiyutha komalombwelo ota ya ka talika nawa opo ya vulike, nokulundulula onkalo yawo. Okwa kumike aanafaalama ya kale yena einekelo mopolisi, oshoka mbaka oyi itulamo. Okwa indile aapolisi yiilando mbyoka kutya sho ta ya ka tsakanena ishewe naanafaalama poshigongi sha landula okwa hala okuuva omahokololo omawanawa. //Hoebeb okwa tseyithile aanafaalama kutya eindilo lyawo opo ya pewe omainda gopolisi gahamano ga gwedhwapo olya uvikwa no li li miilonga nale nokuli. Okwa indile aanafaalama ya kale mekwatathano nopolisi koVenduka, nokulopota iilonga inaa yi opala yaapolisi yomomudhingoloko gwayo mbala. Okwa indile woo aanafaalama opo ya ninge aapolisi ya gwedhwapo, pamwe naaniilonga yawo mboka ye shi kwiinekelwa.