Opolisi ya yakula omaindilo gekuto ge li po43 000

Opolisi yaNamibia oya tseyitha kutya oya yakula omaindilo ge li 42 967 gaamboka ye na ohokwe yokutaambwa mekuto lyoopoosa 1 000 dhopolisi.

Momwaalu ngoka, omwa kuthwa aantu ye li 2 398 (aalumentu 1 664, aakiintu 734) mboka oyo taya ka ningilwa okakonakono opo mu tothwe mo mboka taya kutwa yo ya ka ningilwe omadheulo guupolisi.

Omupopiliko gwopolisi, omupevikomufala Kauna Shikwambi okwa popi kutya uukolele wopamadhiladhilo nopalutu owa simana noonkondo, nokwa gwedha po kutya opolisi oya hala okulongekidha mboka ya pyakudhukwa okugandja omayakulo goshigwana, okukaleka po elandulathano, okushililipaleka egameno nokukaleka po ooveta dhoshilongo.

“Nashi kale shu uvitikiwe ko kutya etanga lyopolisi yaNamibia otali yamukula netumba konkalo yegandjo lyoompito dhiilonga okutunga oshigwana. Ashike nando ongaaka, eyamukulo ndyoka kopolisi yaNamibia kalili owala kekandulopo lyonkalo yokwaana iilonga ashike olya nuninwa aalumentu naakiintu mboka ye na eitulemo noye na ohokwe yuupolisi komitima; sha nuninwa mboka ye na ehalo noya pyakudhukwa shili okulongela oshigwana shaNamibia kehe pamwe moshilongo ngaashi tashi pumbiwa,”osho a popi ngaaka.

Okwa koleke kutya aaningi yomaindilo mboka ya pita momusholondondo otaya vulu okwiimona uuna ya talelepo oombonge oonene dhopolisi miitopolwa nenge ya kwatathana nepandja lyopolisi koFacebook nenge ondjukukithi yopamalungula yopolisi.

Okakonakono kokutotha mo mboka taya ka kutwa, otaka ningwa poombelewa oonene dhopolisi miitopolwa ya yooloka pokati komasiku 31 Mei nomasiku 18 Juni.

Shikwambi okwa popi kutya elalakano lyokakonakono okushilipaleka kutya oomboka owala ye na uukolele lela naamboka taya opalele taya ka tothwa mo.

Monkatu yotango yokakonakono, aantu otaya ka talwa owino yawo yelaka, taku landula uukolele wokolutu, uukolele wopaunamiti osho wo okutalwa ngele oye na iimbuluma.

Mboka taye ke shi pondola otaya ka kutwa nokufalwa komadheulo guupolisi.

Pethimbo taya ilopota, oya pumbwa okufaalela oodokumentu dhawo adhihe dholela naangoka ta ka monika a ninga eindilo nodokumente yiifundja ota ka kuthwa mo momusholondondo gwaamboka taya ka tothwa mo, nota ka katukilwa onkatu.

Shikwambi okwa londodha oshigwana shi kotokele omakengelelo ngoka tashi vulika ga ka longithwe okudhenga aantu mokatoo pethimbo ndika lyekuto nokwa yeleke kutya opolisi ihayi pula nande ofuto komuntu uuna tayi kutu.

“Kehe ngoka ta ka futa sha oteshi ningi paumwene ishewe naangoka ta ka pula aantu ofuto, otatu indile a lopotwe mbala kopolisi yi li popepi,” osho Shikwambi a popi ngaaka.

Onkalo yi li pombanda yeindilo mekuto lyopolisi otayi gandja uumbangi kutya moshilongo omu na onkalo yi li pombanda yokwaana iilonga moka kwa ndhindhilikwa kutya aagundjuka ye li poopelesenda 50, kaye na iilonga moshilongo.

MuMaalitsa numvo, oshigwana okwa li sha thigwa monkumwe sho aagundjuka ye li po2 000 mOvenduka okwa li ya mbombolokele pehala lyorestolanda nomainyanyudho lyedhina Temperature Lounge and Restaurant okugandja omaindilo gawo, nonande opwa li owala oompito 16 dhiilonga.

Lwanima omwedhi ngoka, aantu omathele oya mbombolokele pofabulika yoohi, Omualu Fishing, mOmbaye okukonga iilonga sha landula sho aantu kwa li ya taambathana etumwalaka kutya oyu uvu ehangano ndyoka tali kutu.

ITAPU NINGWA UULINGILINGI

Ondjayi yetanga lyopolisi Joseph Shikongo muApilili okwi indile aanambelewa ya longe iilonga yawo nawa pethimbo lyekuto lyaapolisi noya londodhwa ya yande iilonga yuulungilingi.

Pauyelele wonzonkundaneki yaNew Era, Shikongo okwa popi kutya aanambelewa mboka ye na oshinakugwanithwa shokutaamba omaindilo gekuto naya shilipaleke kutya oya longa paushili nopauyuuki.

“Iilonga otayi ka pewa aayehe mboka ya adha iipumbiwa, onkene kehe ngoka a adha iipumbiwa na ninge eindilo,” osho a popi ngaaka, omwedhi gwa zi ko.

Mboka taya kutwa oye na okukala ye na onzapo yondondo 12 yonkatu yoNSSCO/H nenge ondondo 11 (yomusindalandu omupe gwelongo)

Aaningi yomaindilo naya kale ye li pokati koomvula 18 no35, ishewe inaya kala ye na ondjokonona yiimbuluma, ye na uundjolowele wu li nawa komaluntu, omanga aakiintu otaya ka konakonwa ngele oye na omategelelo.

Maantu mboka 1 000 taya ka kutwa, omwa kwatelwa aantu ye li 750 mboka taya zi miitopolwa ayihe moshilongo, omanga ye li 250 otaya zi koshikondo shomayakulo gaagundjuka o-National Youth Service,