Opolisi ya Musati ya kwata aafekelwa 10 mOkalongo

OPOLISI ya Musati mewiliko lya Komanda yayo Komufala gwOpevi gwOpolisi Simion Shindinge, oya kwata po aalumentu ye li 10 shi na sha neyakopo lyiitungitho yOshipangelo sha Kalongo, shoka sha li nale Oklinika noshi li nee tashi tamununwa mo pethimbo ndika kOkampani yedhina Haudano Bricks and Builders Cc mewiliko lyOmunangeshefa a tseyika nawa gwomOkalongo tate Kaleb Hamwele.

Komanda gwOpolisi mOmumsati Simion Shindinge ta ti kutya omusamane Hamwele okwe ya lopotela kutya okuza tuu mu Novemba omvula ya zi ko, oya kala taya yongola iitungitho yawo ngashi oosamende, Uutiyelesa nosho tuu tayi yakwa po. mEtiyali nee lyoshiwike shika oya lopotelwa komusamane Hamwele kutya oya yakelwa ishewe uutiyelesa, oosamande niitungitho yimwe. Opolisi oye ya nokutameka tayi kongo. Tayi kiitsa pokuma pwa fa pwa fulwa nashi ya fululula po oyiitsu mUutiyelesa wa fumvikwa kohi yevi taya konenene omusinda gwohauto ya enda nomatayile kaage na nawa oonyole. Moku yi konenena moka oya lamba omisinda dhawo sigo taye yi mono kutya ohayi zi peni . Omakonaakono ga gwedhwa po, Opolisi oyi itsu natango miilambo yimwe mwa fumvikwa iitungitho, kwa longithwa tuu ohauto ndjoka. Sho ye yi mono na mwene gwawo gwomunangeshefa pOnandjaba mpoka, ekonaakono lya kwata miiti olya yi mo. Opolisi oya yi kegumbo lyonunangeshefa ngoka komukunda Omutundungu, hoka ya adha ondumba yOoshako dhOosamende, dhuutiyelesa, noshowo iitenda yokutungitha yomaludhi gi ili nogi ili, iipundi ya ningwa miipilangi ya yakwa kehala lyetungo lyoshipangelo noshowo iinima yilwe oyindji lela. Iinima yimwe oya adhika nee megumbo lyomunangeshefa ngoka. Yimwe omepya lye, yimwe omoshigunda shiimuna ye omanga yimwe mekoye lye miihwa moka. Omusamane Hamwele ota ti kutya ongushu yiinima mbyoka ya kelwe po kwali nokumonika oyi li pOoN$48,762.00 omanga mbyoka inayi monika natango yi li pOoN$43,833.95. Tashi eta ayihe kumwe yi kale yi na ongushu yOoN$92,595.95 lwaampoka.
Komufala gwOpevi gwOpolisi Shindinge ta ti, ekonaakono lyOpolisi otali yi komeho notashi vulika pu kale pu na omahala gamwe pwa holekwa iinima yimwe .