Opolisi ya lombwelwa yaa game ombinga nande miilonga yayo

KAKUKUTU kOpolisi ya Namibia Ndjayi Sebastian Ndeitunga okwa kunkilila Opolisi ayihe ya Namibia yi kale tayi longele oshigwana ashihe shi thike pamwe mokuyanda okugama ombinga miilonga yawo yesiku kehe, unene tuu pethimbo lyiikonga yomahogololo ngaka twa thinda gOpaupresidende nogIilyo yOshigongi shOpashigwana noshowo pethimbo lyomahogololo gogene ngoka taga ka kala ko mehuliloshiwike ndi, ano meti 27 sigo eti 28 Novemba 2009.

Ndhika, Kakukutu kOpolisi ya Namibia,Ndjayi Ndeitunga okwe dhi popi pethimbo ta popitha Opolisi yomoShana mOshakati,oshiwike sha zi ko, moka a pandula noonkondo Opolisi ya Shana sho tayi longo nawa mekeelelo lyIimbuluma nokulongelakumwe nawa naaleli naayambidhidhi yoongundu dhi ili nodhi dhOpolotika moShana nosho tuu nAawiliki yalwe yOpashigwana.’ ‘Nandi mu lombwele kutya oshigwana sha Namibia, kutya nee ooshoka shomOshana nenge oshaa peni, otashi tanga nokupandula Opolisi yomo Shana mewiliko lya Komufala gwOpolisi Ndahangwapo Kashihakumwa, omolwiilonga yuupenda tamu longo mpaka. Omolwa uupenda weni neitulemo lyeni iimbuluma moShana oya ya pevi noonkondo. Omwa teya olaikota miilonga yeni ongAapolisi moNamibia na tsikileni nokuninga ngaaka. Otaku ipulwa kutya omwe shi ende ngiini opo omangungo giilyo yOongundu dhOpolotika dha ningile iigongi iinene moShana ehulilo shiwike ndiya lya zile ko, ga kale ina gii puma mumwe nokwiidhenga. Ano, omu li tamu simanekwa mwaashika nomiilonga yeni yilwe yuudhiginini,’ Ndjayi Ndeitunga ta lombwele ongundu yAapolisi moShana ngawo. Ta tsikile ko ta ti Aapolisi aantu mboka ye na okukwatela po ombili negameno lyoshilongo shika noshigwana sha mo. Ano tashi ti ye na okukaleka po oveta, elandulathano nengungumano, nopethimbo nee taya yakula oshigwana ngeyi oye na okukala kaye na hoka ya gama, ano inaya gama komuhoko gwontumba, kaantu yeitaalo lyontumba nenge lyongandi, kombinga yUukashikekookantu nenge kombinga yOpolotika yini. ‘ Omupolisi omukaleli nomuyakuli gwa kehe gumwe na ke na okukala a gama ombinga miilongayakulo ye nande esiku limwe,’ Ndjayi Ndeitunga ta ti ngawo.Ta ti, ngashi methimbo lyiikonga yomahogololo muka, Opolisi oyi na okukala ta yi ulike kutya yo kayi na ombinga mokuyakula Aawiliki yOongundu dhOopolotika dhi ili nodhi ili dha Namibia, iilyo naayambidhidhi yadho noshowo nee kehe gumwe pwaa na ondjoolola, uuna taya pula omayambidhidho kOpolisi. Kakukutu kOpolisi ta ti kutya opu na yamwe ya hala okulongitha Opolisi pa puko. Ndeitunga ta lombwele Opolisi ye kutya inayi etha nande yi longithwe pambambo nopapuko kuyalwe moshigwana, kutya nee oku kale Omukuluntu shi thike peni. Ta ti Opolisi oyi na aluhe okulonga nuuyuki, nelandulathano nokohi yOveta, miilonga yayo yokukaleka po Oveta nElandulathano, ombili, egameno nengungumano. Kakukutu kOpolsi ta ti moNamibia ota mu iiyakele uukwamuhoko, tashi vulika ta wiiyakele wo nomOpolisi. Ndeitunga ta indile nee kOpolisi ya Namibia ayihe, yi ikale ke kokule nombepo ndjoka yuukwamuhoko, oshoka kayi na uuwanawa washa muyo, noyi lile po ashike okutopagula oshigwana sha Namibia, shi kale kashi li we kumwe ngashi shi na okukala. Ndjayi Ndeitunga ta ningi nee eindilo lya kwata miiti kOpolisi ayihe moNamibia yi ilongekidhile nawa omahogololo gOpauperesidende ngoka taga ka kala mEtitano ndika twa thinda lyeti 27 Novemba noshowo Olyomakaya . Ta ti Opolisi itayi kiidhidhimikila nande omuntu ta ka kembadhala okuyona omahogololo ngoka, notayi ka longa naanaa yi ikwatelela kOveta yoshilongo shika ngashi ya tulwa po yi gwanithwe po kOpolisi.