Opolisi ya kwata aakwashigwana yaali Aakiina

AAKWASHIGWANA yaali Aakiina oya kwatwa ‘moshilando sha Kiina’ moshitopolwa shoofabulika shomuumbangalantu waVenduka metitano.Ekwato lyawo olya landula sho ya a dhika taya longo othewa yokwoopaleka iikutu yondjundo yoo grama 250 ta yi holele ndjoka yoludhi lwo MAQ.

Mbaka yaali otaya tamanekelwa okuyona ompango yuumwene wookopi noshowo uulingilingi.Oya pewa yiifutilemo noodola omayovi 10 000 noshowo 15 000, no ya holoka mompangu Omaandaha.Aatamanekwa mbaka ota ku tiwa ohaya longele othewa yawo ndjika kaayishi yoshili yoMAQ mofabulika ontshona ndjoka ya li ya shigwa kondunda yokulala. Othewa yawo ndjika oya kala ta yi landitha nawa ta yi endele kombunda yaandjoka yoshili ha yi longwa kehangano lya South Africa lyedhina Bliss Chemicals.Pethimbo Aakiina mbaka yaali ya kwatwa kapwa li pwa tseyika kutya oya li ye na aaniilonga yangapi miilonga mbika, noshowo kutya oothewa ndhoka dha li mofabulika yawo odha li dhongushu yi thike peni.Pahokololo lyomukonakoni, Rector Sandema gwopolisi ya Namibia yuulunga wopamahupilo, othewa ndjika ka yi na ongushu oku yeleka naandjoka yoshili, oya li ha yi landithwa momwaalu omunene moositola oontshona moshilongo noshowo kuAngola.Okwa ti oshinima shika sho shi itsuwa muka ota shi vulika shika le ashike okandungu okashona, na opena ompito kutya iilonga yoludhi nduka oha yi longwa nopOshikango.Opolisi oya mono othewa ndjika sha landula omanyenyeto goshigwana kutya othewa ndjika ka yi shi ombwanawa okuyeleka naandjoka yoshili.Oya mono eyooloko mekwathelo lyopolisi Muuyuni nenge Interpol.Konima sho opolisi ya ningi omakonakono mokulongitha othewa ndjika oya tokola opo ya ponokele ehala ndika.Omayooloko ngoka ge li po pokati koothewa ndhika mbali ogo ngaashi oondanda dhomadhina MAQ odhi na omalwaala ga yooloka ndjoka yiifundja oyi na oongenge oonduudhe omanga ndjika yoshili oyi na oongenge oobulau.Kakele komayooloko ngoka goondanda, okapakete kothewa ndjika koograma 250 kaakiina ohaka wigi pokati koograma 170 sigo 245, oshikwawo osho shika kutya oonaku longitha othewa ndjoka yaaKiina ota ya ti oha yi fike ominwe dhiikaha ngele ye yi longitha.Pakonakono ota ku ti othewa ndjoka ya longwa kaakiina oha yi tulwa ashike moshipakete shoograma 250, omanga ndjoka yoshili ohayi tulwa miipakete yoshiwiha okuza poograma 35 sigo oposhako yookilograma ntano.Ondando yoMAQ yiifundja oyo oodola 3,50 sigo 4-00 ngele ta yi landwa oku za kofabulika ndjika, yo ta yi landithwa po koodola ntano sigo oodola hetatu niitano.Othewa yoMAQ yoshili oha yi gu oodoola heyali dha Namibia no ha yi landithwa unene moositola oonene dhomoNamibia.Opolisi oy ipyakidhila ngashingeyi oku konakona kutya iipakete moka hamu tulwa othewa ndjika oha yi longwa peni moshilongo, no ku tala kutya oolye mboka yalwe haya longo pamwe naaKiina mbaka.Omusamane Tony Nel ngoka oye ha andjaganeke othewa ya MAQ yoshili okwa pandula opolisi sho no ya mono ofabulika ndjika, nokwa ti ehangano lye ota li longele pamwe nopolisi opo ya se oshimpwiyu kutya oothewa ndhoka dhiifundja odha kuthwa mo momalandithilo moshilongo ashihe.’Otwa kunkwa’osho Nel a ti.Ngame pamwe nooyene yedhina oshinima otwe shi talako nomeho omanene noshinima shi na okukonenenwa.’Na uuyelele kehe ta wu vulu okumonika na wu gandjwe opo iilongomwa mbyoka ka yi shi yongushu yi kuthwe mo momalandithilo.Omanyenyeto gena sha nothewa ndjoka yiifundja ogo ngoka kutya oha yi lulumike nenge oha yi fike iikaha yoo na ku opaleka, omolwa oshimongwa shoka yina.Okwa ti othewathewa yoMAQ oha yi konakonwa lela pamuthika gwiilongomwa moSouth Africa na ita yi vulu okufika iikaha yaa opaleki.Sho oshifo shika sha talelepo ofabulika ndjika osha adha nale opolisi ya kutha po oothewa dhuuwindji wiihauto itatu, shimwe oku za mositola ya gumwe ngoka ha landa kaaKiina mbaka.Ofabulika oya li yuu udha iipakete yoothewa mbyoka ya li ya tegelelwa oku tulwa othewa, noshowo iilongitho yilwe mbyoka ha yi longithwa mokuninga othewa ndjika.Ofabulika nayo woo oya pumbwa okukonakonwa kukomufala gwaaniilonga molwaashoka oya nika oshiponga kaaniilonga mboka haaya longo moka.Othewa ndjika oha yi pakelwa woo moshipakete shina edhina ha li ithanwa QWA.Koshipakete sho QWA okwa nyolwa kutya othewa oha yi longwa kehangano lya Yangtse River Properties CC yi na okaketha kopoosa 98243 moVenduka,Namibia okwa shangwa a pukithwa koshipakete shika ongo Namibla Othewa oya uvaneka okwoopaleka oku wanawa kohi yoshipalanyolo ‘QWA your best Choose’ peha lyo ‘Choice’.Sandema okwa ti ndjika oyo oshilongomwa shotango shiikwathewa shiifundja ta shi kwatwa moNamibia , kakele kuuCD nuuDVd mboka owo olundji ha u kwatwa ongo iilongomwa ya fukilwa nenge yiifundja.