Opolisi ya Hangwena ya ya nEkopi lya Janeel

OSIPANA yEtanga lyokOompadhi yOpolisi yomoshitopolwa sha Hangwena oyo ya sindana po Ekopi lyUudhano wEtanga lyokOompadhi mboka wa li wa longekidhwa kOkampani ya tseyika nawa yo Cash Loan yedhina Janeel Financial Services, wa dhanenwa mEenhana moshitopolwa sha Hangwena mehuliloshiwike lyeti 10 Apilili 2009 sigo 12 Apilili 2009.

Pa Mukuluntuwiliki gwa Janeel mOshitopolwa sha Hangwena tate David Nambili, Uudhano mbuka wEtanga lyokOompadhi wa Janeel tau ithanwa mOshiingilisa Janeel Cash Loan Soccer Tournament, nowa li wa shilipalekwa nOkapandi kOodola dha Namibia N$5000, owotangotango tau longekidhwa kOkampani ndjika ya Janeel Financial Services moNooli moshitopolwa sha Hangwena.
Uudhano mbuka wa li wa kuthwa ombinga kOosipana odhindji dhEtanga lyokoompadhi moNooli, nowa hulile nee meti 12 Apilili 2009 pEenhana mpoka, owa sindanwa po kOsipana yOpolisi yEtanga lyokoompadhi moshitopolwa sha Hangwena (NamPol Football Club mOhangwena) noya pewa Ekopi nOodola dha Namibia N$2500 konima sho ya dhenge mo Osipana yokoshitopolwa sha Shana yedhina Young Chiefs nookoola 5 dhomu 4 kOopenalti konima sho mokapele yi ithigi othika nola yomu nola.
Young Chiefs okwa pewa N$1500. mEdhingoloko lyoosemi, NamPol okwa dhenga mo Major Power gwomOshitopolwa sha Hangwena nookola 8 dhomu 7, natango kopenalti sho mokapale yi ithigi othika nola yomu nola. Young Chiefs,kelago lela, okwa dhenga mo Young Tops gwomOshitopolwa sha Hangwena nokoola yimwe mo nola medhingoloko lyosemi.
Major Power na Young Tops oya pewa kehe gumwe N$500 omolu ekondjo lyawo.Moses Theofelus, gumwe gwomaalongekidhi yuudhano mbuka okwa lombwela The Namibian kutya uudhano owa enda nawa na kapwa li nande uupyakadhi wa sha.
Ta ti Oosipana adhihe kumwe dhi li 22 dha za mOshitopolwa sha Hangwena, moka mwa ningilwa uudhano mbuka, noshowo dhokiitopolwa ngashi Oshana nOshikoto, odha kuthile ombinga momathigathanopo ngaka, ga tamekele nee mEtitano lyeti 10 Apilili nokuhulila meti 12 Apilili 2009.