Opolisi oyi ilongekidha nawa

OPOLISI ya Namibia oyi ilongekidha nawa omolwa omahogololo na ita yi kiidhidhimikila kehe gumwe ta yono ompango kutya nee ogwo ngundu yini po yopolitika.

Komufala gwopevi gwomiyadhashinana, Hofni Hamufungu okwa londodha kutya ngoka wa hala oku kala mokalimosho uule woomwedhi nenge wootundi, ningila ashike owina mokuyona elandulathano nompango pethimbo ndika.Pethimbo ta kuthileko aatonateli yomahogololo yopaigwana, Hamfungu okwa ti opolisi oyi ilongekidha nawa omolwomahogololo, na kehe omupolisi oku shi shoka ena okuninga pethimbo ndika.Uuna sha pumbiwa, aapolisi ya gwedhwa po ota ya tumwa oku za koombelewa oonene dhopolisi koVenduka, opo ya ka kwathele kiitopolwa.Opolisi ‘ka yi li muudhigu wopapolitika’, Hamufungu ta ulike.Oha yi yamukula ashike kekotampango nokOmpango yopolisi.’Inatu hala okutseya kutya ngoye ogwo ngundu yini, DTA, UDF, Swapo, Swanu nenge tuu oongundu oonkwawo, tse otatu ku manga molwa epogolo ndyoka taku tiwa owa ningi’, Hamfungu a londodha.Omapogolo ngoka taga vulu okumangitha omuntu ongaashi okuyonagula omambapila goongundu dhilwe noku ponokela iilyo yoongundu dhilwe, omuntu oto mangwa woo ngele owa pogola ngaashi mokuhinga ondapo ya pitilila pwaandjoka ya uthwa, Hamufungu a ti.Okwa ti opolisi oha yi tala kutya ompito yoshiponga oyi thike peni pehala lyontumba pena oshigongi shopolitika opo yi soshimpwiyu kutya ota yi yamukula ngiini konkalo.Opolisi oya tsakanene nale naa wiliki yoongundu dhopolitika, pashigwana nopaitopolwa.’Etumwalaka lyetu olyuukilila otwa hala kehe gumwe a tseye kutya shoka sha pumbiwa osho omahogololo gopambili,noshowo etaambo lyiizemo nombili, na ishewe na ya tseye kutya oye na okulandula omulandu gweihumbato lyoongundu dhopolitika’.Omunashipundi gwoKomisi yomahogololo ya Namibia, omusamane Victor Tonchi okwa ti omahogololo ogo esipa lyombunda lyuudemokoli moNamibia.Okwa ti nonando opu na omashongo ogendji nomalundu goondjoho nomakwega sha ziilile methigathano molwa iipundi noshowo ombelewa yopombanda moshilongo, otuna elago oshoka omahogololo ngaka ota ga ambidhidhwa komimvo 20 dhontseyo papolitika, eidhidhimikilathano, ombili nengungumano.Okwa ti omahogololo gonuumvo oga simana oshoka ota ga eta mboka ya dhinika mekwi lyomukalo gwuudemokoli, unene aagundjuka mwa kwatelwa naamboka ha ya ithanwa ‘oondamanguluka’, aakwashigwana mboka ye na uulema, mboka yaana omalukalwa, aakiintu noshowo aakalimo yokomikunda.Tonchi okwa indile iikundaneki yi kale aluhe ya tonata, yo yi kale ooihoontali dhuudemokoli, oku soshimpwiyu kutya ewi lyaahogololi mwakwatelwa lyoyendji mboka itaa ya ti sha olyu uvika.Aahogololi ya tengenekwa ye vule paantu omiliona yimwe moNamibia ota ya hogolola oshigongi shopashigwana shaatotimpango 72 noshowo omuperesidende gwoshilongo metitano nolyomakaya goshiwike shika.