Opolisi otayi kongo natango Aanamibia

OPOLISI ya South Afrika oya ti kutya oyi li natango tayi kongo aafekelwa yAanamibia ye li 12 , shi na sha omateyo gomagumbo nomayugo mOkapa.

Pethimbo ndika, Opolisi oya kwata po aalumentu yAanamibia ye li 14 okuza mEtiyali lyoshiwike sha zi ko, shi na sha nomayugo nomateyo gomagumbo momahala gamwe mOkapa, ngashi pu Bishops Court, Camps Bay, Claremont, Diet Revier na Wynberg.
Mboka ya kwatwa po tango oya kwatwa mEtiyali lyoshiwike sha zi ko, konima sho Opolisi pu Kirstenhof niilyo yOshikondo shOpolisi shokuungaunga niikoya iinene, ya holmena ongundu yaaluymentu yatano moondundundu dhimwe pu Hout Bay.
Aapolisi oya li ya falwa pehala limwe kiilyo yehangano lyOosekuriti lyedhina Mountain Men.Oya li aniwa ya landula oompadhi dhaafekelwa yatatu.
Aafekelwa yamwe ye li omugoyi oya li ya kwatwa po ongula yEtitano lya zi ko, ya kwatelwa pu Milnerton.
Omugandjimulombo gwOpolisi sha Kapa-uningino,Kaptein Frederick van Wyk, okwe shi koleke kutya aafekelwa ayehe 14 oya li ya holoka mOmpangu ya Mengestrata mu Wynberg ongula yOmaandha.
Ayehe oya tindilwa ombooloha na oshipotha shawo oshuundulilwa komasiku 19 ga Mei 2009. Aafekelwa mbaka oya li aniwa ya adhika noshimaliwa sha konda pOondola oomoliyuna mbali, sha za miinima ya yakwa, mbyoka ya li ya li ya holekwa mombashu yimwe molukandwa lwoombashu pu Milnerton momudhingoloko gwa Imizano Yetu.
Miinima mbika omu na nee aniwa Otelevisi yo Plasma, oolaptopa, iikwamalyenge, uumute, oondjembo nomathano. Aafekelwa mbaka oyo nee: Johannes Ndapuka (a tseyika nawa nedhina Johnny) gwoomvula 20, Boheita Shatepamba (29), Joseph Shakolgo (28), Gedison Jonas (20), Johannes Lukas, Emanuel Katombelo, Gideon Shaningwa, Martin Enumba, Ntimbizanele Liqongo (29), Mateus Igantius Taapopi (29), Johannes Mumbala (30), Kristof Shaningwa, Ruben Mweshikolela Kamule (28), na Benyamen Eposhe (28). Yamwe yomuyo otaku popiwa kutya oya li muukwiita omanga yame taku popiwa kutya oya li haya longo moombauto dhoohi pu Hout Bay.
Opolisi oya ti kutya aalumentu mbaka kaye li ye na oombapila dhoondjembo dhika.