Opena olutandu moNapwu kombinga ya GIPF

OKWA kundanwa kutya omuperesidende gwo kulipo gwa Namibia Public Workers Union [Napwu] Sarafina Kandere ina popya oshili kombinga yetokolo lyehangano okuyambidhidha etokolo lyaNUNW opo mboka ya kanithitha iimaliwa yoopenzela dhaaniilonga okupitila moshiketha shomahumithokomeho, ya landulwe.

Aawiliki yopashigwana yamwe ya Napwu oya lombwele oThe Namibian kutya Kanmdere okwa ningi oshinima shika puyemwene naashika inashi kalelapo omahalo gaaniilonga. Kandere okwa li atseyitha oshiwike sha yi kutya Napwu ita yambidhidha eindilo lya NUNW opo mboka yomahangano ngoka ga kanithitha iimaliwa ya GIPF ya landulwe. Oshiketha shomapendulepo DCP osha li sha gandja oodola oomiliona omathele gahamano opo dhi pungulwe momahangano gaa shiwike nawa.Oshiwike shika Kandere okwa ulikwa ku GIPF ongo oshilyo shewilikongundu lyehangano ndika. Omapopyo kutya Kandere ina popya oshili oshe ya komeho goshigongi oshipitithi shopashigwana sha Napwu ehulilo shiwike ta li ya.Opena omaipulo kutya omolwa shike ewiliko lya Napwu lya tokola okukondjitha etokolo lya NUNW opo mboka ya kanitha iimaliwa ya GIPF sha pitile mo DCP ya pulwe nokufutithwa iimaliwa mbyoka.Oshiwike sha yi Kandere okwa ithanene oshigongi shoonkundana mpoka a tile ewilikongundu lya Napwu olya li lya kundathana oshinima sha DCP noshowo iilonga yaawiliki ya GIPF kutya na yi hulithwe po, no ya tokola kutya yo ita ya yambidhidha ethaneko ndyoka lya NUNW.Okongressa ya NUNW oya li ya tokola kutya elelo alihe lya GIPF, noshowo ewilikongundu lya GIPF olya pumbwa okutulwa pevi. Noshikwawo ombelewa yomuperesidende oya indilwa yi tulepo okangundu konakoni ka konakone kutya iimaliwa ya pitile muDCP okuya kaanangeshefa mboka ye yi hehela oya longithwa ngiini.Kandere poshigongi shoonkundana okwa ti ehangano lye olya indile holomende opo a tale oshinima shoka nokusoshimpwiyu kutya opwa longwa uuyuki.Ndele aalele yalwe ya Napwu oya ti yo kaya li noonkundathana dha popiwa ku Kandere onkene oya hala a gandje omishangwa dhoshigongi shoka nomatokolo ngoka ga ningwa poshigongi shoka.Onzo yimwe oya ti ongundumutima ompitithi ya Napwu oya li ya pe okakommittee kiimaliwa iilonga ka konakone oshinima sha DCP noku ninga omushangwahokololo kombinga yaashoka ka mono po. Kandere sho a pulwa a tye sha kwaashika okwa kala ta ti ota galuka neyamukulo ndele ine shi ninga sigo oosho oshifo sha ka nyanyangidhwa.