Ooyene yomagumbo ga Build Together oya hala olusheno

OOYENE yomagumbo ge li 40 gaantu mnboka ye na iiyemo iisho molukanda lwa Taseiblaagte (moKeetmanshoop) ngoka kage na olusheno, mEtitatu lyoshiwike shika oya ningi ehololomadhiladhilo ya geya sho omagumbo gawo inaga tulwa olusheno.

Omagumbo ngaka oga li ga tungwa kohi yOporoyeka ya Build Together ya Muni gwondoolopa ndjika, oomvula mbali dha piti po. Aahololimadhiladhilo mbaka oya li ya gandja ombapila yomanyenyeto gawo kOmunambelewa omukuluntu gwa Keetmanshoop, Paul Vlermuis. ‘Momilema ota tu kala mo ethimbo li thike peni? Olusheno ompumbwe, tu yambidhidheni,’ gamwe gomomapulakata gawo osho ga li ga shangwa ngaaka. Aantu mbaka oya ti kutya oya shaina oondokumende na Muni gwa Keetmanshoop, dhoka tadi ti kutya omagumbo gawo otaga ka tulwa olusheno, ihe sigo onena shika ine yi shi ningilwa. Aahololimadhiladhilo oya gandja nee iiwike iyali kElelo lyondoolopa ndjika, mpoka li na okukala lya yamukula kenyenyete lyawo. Otaya nyenyeto wo kutya omagumbo gawo ina ga kola, molwashoka aniwa oopelesedna 90 dhomagumbo ngaka odhi na omisa, haga piti omeya moombulu omanga omiyelo ihadhi pata nawa.