Oothigwa dhomOngwediva dha pewa omizalo dhosikola

OOTHIGWA hetatu dhoka hadhi mono omayakulo mOprograma yokupukulula aanasikola komatango p Endiki lya Sam Nujoma Multi Purpose Youth Centre, odha li dha pewa omizalo dhosikola – tangi kaanamutimahenda yokOndowishi okupitila momwiiwambi Pia Frey, el li omuyakuli mOprograma ndjika.

Pethimbo lyegandjo lyomizalo dhika, omuunganeki gwEndiki ndika Albertina Ndengu, okwa pandula Frey omolu okuunganeka eindilo lyoshimaliwa opo mboka aanona mbaka ya mone omizalo dhika. Frey okwa li a ningi kookuume nokaakwanezimo ye mOndowishi, ya landele oothigwa dhika omizalo dhosikola.
‘Mokumona onkalo yaanona mbaka ye li moluhepo, onda ningi ekwatathano nookuume naakwanezimo yandje kOndowishi. Oya gongele N$17 000 mbjoka twa landa nawo omizalo dhosikola. Oya gongele woo iikutu iikulu yaanona mbjoka woo tatu gandja nena kuyamwe yomaanona mbaka. Elalakano lyokuunganeka ooshali dhika, otwa hala tu ninge elongo lyaanona mbaka ende nuupu. Danoff ta popi ngaaka.
Ethimbo lyokugandja oshali dhika, osikola yaanona yopetameko ya Teletubbies Kindergarten oya tseyitha wo kutya otayi ka kutha aanona
yaali ye ki ilonge posikola ndjika oshali, sigo ethimbo ta ya thiki pepipi lyokutameka mondondo yotango.
Osikola yaanona ompe yedhina Intergrity School oya tseyitha kutya otayi ka gandja elongo lyopetameko oshali kaanona yaheyali oothigwa naamboka ye li moluhepo.
Aanona mbaka otaaka kala nokuhita ootundi, mwa kwatelwa wo niikwathitholongo noompumbwe dha yooloka oshali. Aanona yethike pomilongo ntano haya hiti mopolohalama ndhika yokomatango nayo wo oya pewa omizalo dhosikola pamwe nayakwawo. Aavali noshowo aasilishimpwiyu yaanona mbaka oyali woo ya holoka noya nyanyukilwa egandjo lyomagano ndika.