Oontauki dha DRC natango odha haka

EPANGELO olya ti ita li pitika oontauki ndhoka dhili pokati koongamba dha Namibia na Botswana dhi galukile moshilongo Shika osha kolekwa ishewe kOmuperesidende Hifikepunye Pohamba pethimbo a li ta kundathana naKomufala gwoontauki gwIigwana ya Hangana moNamibia Joyce Mends-Cole.

Mends-Cole okwa tsakaneke omuperesidende Pohamba metine noku mu kuthila ko kombinga yoontauki 41 ndhoka dha fadhukapo okuza moNamibia mu Juli nuumvo.Ongundu ndjoka ya kwatelamo uunona 23 oya thigi po oshilongo ta ya ti aniwa ka yena egameno, noshowo aniwa oya tila okudhipagwa, shoka kwa li sha popiwa kehangano lyuuthemba womuntu moNamibia(NSHR) sho lya tile epangelo lyaNamibia olya tilitha aantu mbaka neso sho ya nyenyeta kombinga yonkalo ndjoka ya ti ka yi shi ombwanawa pokamba yoontauki pOsire.Aantu mbaka oya kala ya patekena mevi kaali na mwene pokati koongamba dhiilongo mbika iyali konyala uule woomwedhi mbali.Petameko lyoshigongi omuperesidende Pohamba okwa pula kombinga yoontauki ndhika nkene dhi li po, okwa dhimbulutha Mends-Cole kutya Namibia ita ka longa noontauki ndhika ngaashi eshi popya nale.Epangelo pehulilo lya Juli nuumvo olya ganene kutya ka li na siku na li pitike oontauki ndhika 41 dhi galukile koNamibia, nolya ti kutya oontauki ndhika odha yono uuthemba wadho wuuntauki noshowo ompango yokupitikilwa moshilongo, noshowo odha longitha nayi etaambo lyaayenda lyaNamibia.Mends_Cole okwa tseyithile Pohamba kutya epangelo lya Botswana oli i pyakidhila noku tala ngele ota li pe aantu mbaka omuthika guuntauki, ndele okwa ti ehangano lye lyoUNHCR ina li tseyithilwa sha natango kombinga yoshinima shika.Oontauki adhihe 41 odha za koDRC.Sho a pulwa ngele opu na ishewe yamwe yo moontauki taya dhila dhila oku thiga po oshilongo, Mends-Cole okwa lombwele omuperesidende kutya ke na uuyelele wa sha mwaashika, ndele okwa popi kutya okwa lulilwa molwaashoka oontauki dhimwe odha pukithwa, sho dha lombwelwa kutya ngele odha taaguluka oongamba ota dhi ka pewa omuthika guuntauki palwe pwiili.Konima yoonkundathana ndhika Mends-Cole okwa lombwele oThe Namibian kutya kakele koonkundathana kombinga yadho ,UNHCR okwa popi woo kombinga yo ku tula oontauki mumwe naakwashigwana.Ta ti shika, osha hala okutya oontauki dhi pitikwe dhiye moshilongo,dhi ninge iilyo yoshilongo, ndele haku kala ashike oontauki.Okwa ti shika osho elalakano limwe lyomomalakano gatatu ga UNHCR okwaadha epotokono lyomukundu gwoontauki ta gu kalelele.Okwa ti okutaamba oontauki noku dhi ninga oshitopolwa shoshigwana moka dhi li, ota shi pitike opo dhi kale nonkalamwenyo yi li nawa noyesimano nombili, na oontauki odhindji dhopOsire odha hala shika osho dhi ningilwe.Oompito oonkwawo mbali odha kwatela mo okushunithwa kiilongo hoka dha za pahalo lyontauki yoyene, nenge oku tuma ontauki koshilongo oshititatu hoka ontauki ta yi vulu okutaambwa noku uvithwa uugumbo ngele nani ita yi vulu oku shuna koshilongo sho yaandjawo.Mends-Cole okwa lombwele omuperesidende Pohamba kutya UNHCR ota longo kombinga yoshinima shika opo elalakano ndika li adhike, onkene omunambelewa a za koombelewa oonene dhoUNHCR okwa li nale moNamibia okukundathana oshinima shika naakalelipo yehangano ndika moshilongo.