Oontauki dha Angola odhindji dha shuna kegumbo

OONTAUKI odhindji dha Angola ndhoka dha li kokamba yoontauki ya Osire moNamibia dha shuna koshilongo shaandjawo, Angola nopu na ashike dhi li eyovi limwe nomathele gatano (1500) ndhoka dhi na natango okulongekidhwa dhi shune.

Ndhika odha popiwa nokutseyithwa kOmukalelipo gwEhangano lyOontauki lyIigwanahangana moNamibia, Laurence Mgbangson moonkundathana dhe noThe Namibian pOndangwa mOshana mEtiyali lyoshiwike shika. Mgbangson ta ti petameko lela lyomimvo dhomilongohetatu, moNamibia omwa li mwa ndhindhilikwa oontauki dha Angola dhi li pomayovi omulongonagatano, ndhoka konima sho oshilongo sha manguluka dha tulwa mokamba yoontaukli ya Sire mOtjozondjupa. Pokati komumvo 2002 nomumvo 2007, opwa longekidhwa oontauki dha Angola, okuza mOsire moka, dhi vulithe pomayovi omulongo (10,000) ndhoka dha li dha hala oku shuna koAngola nodha shuna shili. Tapu kala ashike nee dhi li pomayovi gane nomathele gahamano (4600). Pokati mpoka, Mgbangson ta ti, inapu kala we pu na manga omalongekidho gokushunitha oontauki dha Angola. Okuya momumvo 2010 nomumvo 2011, okwa longekidhwa ku shunithwe natango omwaalu gwontumba goontauki dha Angola, ashike odhindji odha kala inaadhi hala nawa okushuna, omolu omatompelo gontumba gongandi. Omumvo nguka, Mgbangson ta ti, okwa ningwa etokolo pokati kehangano lyawo lyoontauki nomapangelo gomoshitopolwa shuumbugantu moka miilongo yawo mu na oontauki dha Angola kutya nadhi shune koshilongo shaandjawo molwashoka ngashingeyi okwa holoka ombili nengungumano. Eindilo lya zi unene kepangelo lyawo lya Angola. Mgbangson ta ti oya tameke nee noku yelithila oontauki ndhika etokolo ndika. Ehangano lyOontauki lyOpaigwana yo nepangelo lya Namibia nolya Angola, oya tula po nee ongamba kutya oontauki adhihe dha Angola ndhoka dha dhidhilikwa odhi na okukala dha yela mo, moNamibia okuya momasiku 30 Juni 2012, ano pehulilo lyomwedhi nguka. Ta ti okuza mu Mei nuumvo, sigo ometitatu lyoshiwike shika, oya shunitha nale oontauki dhi li eyovi limwe nomathele gaheyali (1700), dhomomayovi gane nomathele gahamano (4600). Ndhoka dha kala dha hala okushuna kudhodhene, oshoka ita ya thiminike naanaa omuntu ngele ina hala okushuna kuye mwene. Ta ti ngashiingeyi opu na, natango dhi li peyovi limwe nomathele gatano (1500) ndhoka dha tokola kudho dhene okushuna ko Angola yawo, nopwa hupu nee dhi li peyovi limwe nomathele gane (1400) ndhoka dha tokola kutya itadhi shuna omolu omatompelo gontumba gongandi. Mboka nee ya ti itaya shu na, Mgbangson ta ti, itaya kala we ya yalulwa ongoontauki notaya kala kuyo yene ngawo. Ashike nee itaya vulu okukala moNamibia yaa na epitikilo noye na okukonga oombapila dhokukala moNamibia nenge ano okuya hoka ya hala ya ka kale. Mo Namibia noshowo miilongo yilwe itamu kala we omuAngola taku tiwa kutya ontauki. Ngoka ta ka kala mo okuza konima yomasiku 30 ga Juni nuumvo, shapo oongoka ti ikongele uukwashigwana wa Namibia nenge ta kala e na ombapila yokukala mo pakathimbo nenge yiilonga yopakathimbo. Mgbangson, ta ti oontauki ndhoka dha hupa ko dhi li 1500, otadhi ka shunithwa koAngola mbala. Oshiwike shika, okwa shunithwa nee dhimwe, omanga meti 25 neti 26 Juni 2012, taku ka shunithwa ishewe ongundu yimwe nokwa tegelelwa nee ndjoka tayi ka hupa ko yi ka kale ya shunithwa meti 5 neti 6 Juli 2012. Nosha yela nee kutya okuza meti 6 Juli 2012 moNamibia itamu ka kala we ontauki ya Angola ya ndhindhilikwa.Pokati mpoka ookaansela yiikandjohogololo otaya uvika moradio moka tayi igidha kutya Aangola noshowo aakwashigwana yalwe mboka ye li natango aakwiilongo moNamibia naya ye koombelewa dhawo ye kiishangithe kutya otaya kala aaNamibia nenge ongiini. Taya ti naye shi ninge manga omasiku 26 Juni nuumvo inaga pita. Mgbangson ta ti mboka taya shunithwa ohaya pewa oodola dha Amerika omathele gaali (U$200), kombinga yaakuluntu, naanona ohaya pewa oodola dha Amerika ethele limwe (U$100) noshowo iiyakulitho yilwe. Mgbangson, ngoka a ti kutya opu natango oontauki dha Angola dhi li po 20 lwaampoka, dha zile mo mOsire dha ka konga iilonga nodhi na nee nadho okugaluka dhi shunithwe kegumbo, ta pandula Namibia sho a kala nawa nokusila oshimpwiyu oontauki dha Angola ndhika, moku dhi pa elongo, uuhaku nosho tuu. Ta indile kiilongo iikwawo yi landule oshiholelwa oshiwanawa shika sha Namibia.