Oonkundathana nookomufala ya ECN dha kalekwa manga

OMAPULAPULO gaaindili yuukomufala woKommissi yOmahogololo ya Namibia oga undulilwa komeho sigo oko masiku gane noshowo gatano ga Juli nuumvo.

Oonkundathana oku tala kutya aaindili yeni yomwaamboka omulongo na yatano ya gwana oku pewa uukomufala mbuka oga kalekwa oshoka mboka ye na oku ya pulapula ayehe , ina ya gwanapo.Omapulapulo oga li ge na oku kalako Etiyali oshiwike shika ndele yaali yomaapuli yaa indili ka ya li taya vulu oku kala po, pahapu dhOmuwiliki gwolutu lwomahogololo, Moses Ndjarakana.Ongundu yaapulapuli oya thikama mu Amushanga gwOmpangu Yopombanda, Elsie Schickerling ongo omunashipundi. Iilyo yilwe yokangundu haka oyo Bradley Basson omupevinashipundi, Eileen Rakow gwomombelewa yOmbudsman. Iilyo iikwawo yokangundu hoka oyo Louis Karsten,Mathilda Jankie-Shakwa na Elizabeth Cline. Okommissi yOmahogololo oya tseyitha woo kutya omuhogololi kehe okwa manguluka oku kala pomapulapulo mpoka shampa ashike te shi ningi melandulathano lili nawa. Ishewe omuhogololi iishangitha ota vulu oku tuma ombapila ngele ina hala omwiindili gumwe gwaambaka opo a pewe oshinakugwanithwa shewiliko lyomahogololo ongo okomufala yoKommissi yomahogololo. Ekondjitho inaa li hala omwiindili gwontumba a ningwe komufala oli na oku tuminwa kwaamushanga gwOkommissi yomahogololo, Moses Ndjarakana.Omuwiliki gwolutu lwOmahogololo lwa Namibia , okwa ti oshikako shiilonga yookomufala mboka ye li miilonga ota shi hulu momasiku gahetatu ga Juli nuumvo, konima sho sha li sha lelepekwa oku za mu Auguste omumvogu. Ongundu yaapulapuli oyi na okugandja omadhina gaaindili yahetatu kOmuperesidende Hifikepunye Pohamba momasiku ga 8 ga Juli, opo a kuthemo aantu yatano mboka ta ulike ongo ookomufala .Mboka ya hala oku ulikwa ongo ookomufala oyo, Joseph Diescho, Kaijata Kangueehi, Petrina N Owusu-Afriyie, Hendrik R Tjibeba, Joshua N Amukugo, Albertina Nangolo, Salomon April, Ulrich Freyer, Christine Liswaniso , Rodney Guiseb, Cavin Mwinga, Barney Karuuombe na /Awebahe //Hoeseb.Ndjarakana okwa ti iipumbiwa ya longithwa mokuhogolola mbaka oyo uukwashigwana wa Namibia, uulongelwe wonkatu yelongo yo Bachelor yoomvula ndatu nenge wu thike pwaandjoka mowino yoompango, mopolitika, nenge muunongononi wonkalathano, noshowo euveko lyopolitika nondjokonona ya Namibia. Iipumbiwa yilwe oyo uuyuki, okwaa gamombinga papolitika, omuneithano lyaanokapethili noshowo omadhiladhilo gopaumwene gokukonenena.