Oonkundathana kombinga yoondjambi

O
ONKUNDATHANA kombinga yegwedhelo lyoondjambi dhaaniilonga yepangelo masiku dha manithwa. Opwa tengenekwa oonkundathana ndhoka dhika manithwe momasiku 27 ga Junie nuumvo, nkene dha tamekele mu Mai. Nonando inashi kolekwa ota ku tengenekwa kutya egwedhelo ndika ota li kala pooperesenda 10 komuniilonga kehe.

Aakalelipo yEpangelo no yaaniilonga oya kala ya mwena kombinga yoonkundathana ndhika, kakele pethimbo ndyoka omahangano gaaniilonga ga li giikuthamo moonkundathana mu Mai, ya lundile epangelo ta li kundathana mombepo yaali nawa.Omahangano gaaniilonga oga li ga nyenyeta kombinga yiimaliwa mbyoka ya tulwa poshitaafula kepangelo ongo yomagwedhelo ya tile ina yi kundathanwa omanga omwaalu inaa gu tseyithwa. Oya li ya ti holomende okwa ningi etokolo lye oye awike.Omahangano gaaniilonga oga galukile koonkundathana omwedhi nguka , no ngashingeyi oga mwena itaaga ti sha kombinga yaashoka tashi ningwa kombinga yoonkundathana ndhika.Ngele aaniilonga mbaka oya pewa ooperesenda 10, nena otashi ti, konyala aaniilonga omayovi 84 000 yepangelo ota ya ka londeka omwaalu gwiimaliwa ya pumbiwa , mbyoka ta yi ka pitilila oomililona ndhoka dha tulwapo kepangelo dhili 844. Ominista Yemona yopevi, Calle Schlettwein okwa ti egwedhelo ndyoka lya thanekwa oli na oku gandjwa meni lyomwaalu ngoka gwa uthwa , pamutengenekothaneko gwembo lyomumvo gwiimaliwa 2011-12. Okwa ti kapena we sha tashi vulu okugwedhwako kwaambyoka.ke.Ina vula oku koleka kutya opwa adhika euvathano, molwaashoka ye okwa ningi esiku pondje yoshilongo. Omanga amushanga gwoKabinete, Frans Kapofi okwa ti oonkundathana dha thanekwa dhi ningwe oshiwike shika, odha undulilwa komeho. Ina gandja uuyelele washa sho a pulwa ngele opwa adhika etsokumwe, a ti sigo oompaka kapena shoka sha manithwa. Omunawino gwomahupilo mongundu yOmbaanga Yotango yOpashigwana, Daniel Motinga okwa ti ota shi kumitha kutya omathimbo ogendji oondjambi oha dhi yi pombanda okuyeleka nondjele ye ngushuluko, a ti shika itashi vulu oku kalekwapo muulethimbo unene tuu oku shi talela monkalo yokwaana iilonga yi li pombanda. Aaniilonga yepangelo oya mwene egwedhelo lyoondjambi nooperesenda omilongo 24 oku za 2009 ndyoka lya li lya kwata oomvula mbali.