Oonkundathana kombinga ya Zim dha hula ina pu tokolwa sha

H
ARARE – Oonkundathana kombinga yedhiladhilo lyokweeta po Epangelo lyopaukumwe mu Zimbabwe, odha hulu mOmaandaha goshiwike shika ina pu tokolwa sha.

Omukwanepangelo gumwe okwa popi kutya aaleli yiilongo yAafrika lyUumbugantu otaya ka kundathana okwaatsa kumwe pokati kOmupresidende Robert Mugabe nomOmuwilii gwongundu Movement for Democratic Change (MDC), Morgan Tsvangirai, poshigongi shomeendelelo shiilyolongo yo SADC, tashi ka kala mu Botswana nenge mu South Afrika oshiwike tu uka.
Mugabe na Tsavangirai ayehe oya zimina aniwa okuya koshigongi shika. ‘Kutse ong’MDC, ndika olyo ngiika esiku eluudhe noonkondo monkalamwenyo yetu,’ Tsvangirai osho a popi ngaaka, konima yoonkundathna dhika – dhoka dha li dha kwata oowili omulongo nambali. Epangelo lyopaukumwe okwa talika kutya ogwo ashike oshinima tashi ka kwathela okukwathela eliko oshilongo shika kali ye moshiponga thiluthilu. Pethimbo ndika, oondando dhiinima ohadhi ndambula kehe esiku na aantu ya konda po 2 000 oya si komukithi gwOkolera.
Nande ongaaka, etsokumweuvathano lyokweeta po Epangelo ndika mu Zimbabwe (ndyoka lya li lya shainwa mu Septemba gwomumvo gwa zi ko), olya ndopa okweeta po sha shomupondo – sha etwa kokwaatsakumwe kutya kombinga yOoministri dhoka dha simana.
Mugabe okwa ti oonkundathana odha ndopa okweeta po, ihe otashi ka tsikila. Mugabe okwa gandja uusama ku MDC, ta ti kutya opaati ndjika oya mboloka shoka sha li sha tokolwa ku SADC kombinga yokweeta po Epangelo ndika moshilongo.
Nande ongaaka, Tsvangirai okwa ti MDC okwa moshilongo mu ye Epangelo lyopaukumwe moshilongo, ihe ongele ashike Mugabe ta ka gandja Ooministeri dha kola ngashi ndjoka yIikwameni, yIimaliwa noyOmauyelele kopaati ye. Omupresidende gwa South Afrika Kgalema Motlanthe, Omupresidende gwa Mozambique, Armando Guebuza nOmuungaungi nonkalo ya Zimbabwe Thabo Mbeki, omo ya li moshigongi shika.
Omukuluntuwiliki gwa SADC, Tomaz Salmao, okwa ti oshigongi shomeendelelo sha SADC shoka tashi ka ningwa mOmaandaha, otashi ka kundathana eindilo lya Tsvangirai.
‘Okuza mpoka, ota ku ka pitithwa nee omushangwa,’ Salmao osho a popi ngaaka.