Oonkundana pafupi moAfrica

DURBAN: Cosatu okwa dhiladhila oku konenena oongeshefa noshowo iikondo yepangelo mbyoka hayi longitha aaniilonga okupitila momahangano gokuhehelitha aaniilonga. Amushanga gwa Cosatu moKwaZulu Natal, Zet Luzipho okwa ti ehangano lye ota li ka gongela omiyalu dhomahangano noshowo iikondo yepangelo mbyoka ha yi longitha omahangano ngoka .

Okwa ti ota ya ka dhigupaleka onkalamwenyo yomahangano ngoka ngaashi oku ga kondeka opo mugo mwaa yiwe noshowo okulongitha omikalo dhilwe dhokuholola omadhiladhilo gawo.LUSAKA: Ombaanga yomapungulo ya Nigeria ota yi ka longela kumwe nehangano ha li landitha olusheno koomina mo Zambia opo ya tungepo oosasiona hamano dhokulonga olusheno lwomeya. Oosasiona ndhika odha tegelelwa dhi ka kothe oodola obiliona yimwe. Oosasiona ndhika okwa tengenekwa dhina oonkondo okudhiga olusheno lwoomegawatt 800 nenge dhi vulepo mpoka.Omuwiliki gwehangano ndika Michael Tarney okwa ti otaya tala tango koproyeka yolusheno komulonga gwa Kabompo muumbangalantu ninginino wa Zambia noshowo nee ooproyeka ntano komulonga gwa Luapula , dha tengenekwa tadhi kotha oodola obiliona yimwe.JOHANNESBURG: Ehangano lyoomina lya Impala Platinum olya ti epangelo lya Zimbabwe olina oku konga iimaliwa opo li lande iipambuliko yooperesenda 31 ndyoka lya hala oku kala lina mehangano lya Zimplats, ngele hasho iipambuliko mbyoka ita yi ka monika nokugandjwa.Zimbabwe ota pula omahangano agehe omakwiilongo opo ga gandje iipambuliko yooperesenda 51 momahangano ngoka kaa Zimbabwe. Epangelo olya tameke okuthiminika tango oomina opo dhi gandje iipambuliko kaaZimbabwe.Konima yomathiniko nomahilathano ogendji Implats okwa uvaneke ta ka landitha iipambuliko yooperesenda 31 kepangelo noshowo omilongo 20 kaakwashigwana.