Oonime tadhi li po iimuna mOmusati

ELELO lya Ngandjera kumwe nAaniimuna ye na oohambo noofaalama dhawo muuninginino nomuuningininombugantu wa Ngandjera moshitopolwa sha Musati oye li taya nyenyetele Epangelo, unene tuuUuministeli wOmidhingoloko nOmatalelopo kutya otaya etha ashike iimuna yawo tayi lika po koonime (koonkoshi) okuza tuu momumvo 2000 sigo okonena ndjika.

•OSWALD SHIVUTE
Amushanga gwOmukwaniilwa gwa Ngandjera tatekulu Jafet Munkundi, tate Daniel Ndakukamo ngoka e yile kOshifo shika pehala lyOmukwaniilwa Munkundi nElelo lyawo lyOpamuthigululwakalo lya Ngandjera, ota ti kutya aakwashigwana yaanafalama yawo oye li taya lopota nokunyenyeta noonkondo omolu iimuna yawo tayi lika po koonime pwaa na ekwatho lyasha okuza tuu momumvo ngoka 2000.
Ndakukama ota ti ngashi ye kumwe nOmukwaniilwa Munkundi oya kanitha iimuna oyindji, ngashi unene oongombe, iikombo, oondoongi, oonkambe, oonzi noshowo nee noondjuhwa. Ayihe ya lika po koonime ndhoka dhi iteyela moshitopolwa shOohambo dhawo sha Mutambogwomawe muuningininombugantu wa Ngandjera moka.
Amushanga gwOmukwaniilwa gwa Ngandjera, nguka ta ti kutya momumvo 2000, Omukwaniilwa Munkundi okwa likila koonime oongombe dhi li omulongo (10), oondoongi ndatu (3) noshowo onkambe yimwe (1). Okuza momumvo 2001 sigo omomumvo 2002, Omukwaniilwa kumwe na tate Ndakukama oya likila oongombe dhi li omilongombali naheyali (27), iikombo ine (4), oondoongi ndatu (3) noonkambe mbali (2).
Omvula ya zi ko oya likila oongombe dhi li omulongonantano (15), mwa kwatelwa nuutana, iikombo ihatatu (8) oondoongi ndatu (3) noondjuhwa hamano (12), omanga nuumvo 2009, sigo opo mpaka oya likila nale oongombe dhi li ndatu (3) mwa kwatelwa onzezi yondilo yOoN$25,000 yomusamane Ndakukama.
Oonime onkee tadhi tsikile nokulya po iimuna yaanahambo hoka pwaa na ekwatho negameno lyasha.
‘Ndhika nda popya mpaka iimuna ashike yetu nOmukwaniilwa, inandi popya mbyoka yaakwashigwana yalwe, ano yaanafaalama naanahambo yalwe taya litha moshitopolwa tuu shetu shoka. Iimuna oyindji ya lika po notayi lika po koonime ndhoka tadhi zi mOshikunino shIinamwenyo ethimbo alihe.
Twa li kulopota, itapu ningwa sha. Otwa shanga nOombapila dhuuka kUuministeli wEgameno lyIiyamakuti okuza tuu momumvo 2000 moka, ashike kemanya kuza wo ontsi, itaye tu yamukula.
Aanambelewa yamwe yomUuministeli wOmidhingoloko nEgameno lyUuntshitwe, hatu ningi nayo omakwatathano paengodhi nosho tuu, otaye tu lombwele kutya aniwa okwa ti ashike naya hinge mo iinamwenyo mbyoka, inaye yi yaha noku yi dhipaga nande.
Sho nee taye yi galulile kEtosha, kayi kala ko, ohayi galuka ko moompadhi oontalala nokutsikila tayi li po iimuna yetu ngashi shito, oshoka ondhalete yoshikunino oya tokauka noyi na oombululu odhindji moka iilikama mbika hayi pitile nokwiiyaka mo moshikunino ngeyi.
Uuministeli otwe wu shangela oombapila, tatu wu indile wu pangele ondhalate yayo ndjoka, ashike oko ngaa kaku za eyamukulo hoka, notu li nee twa lulilwa
kiilikama mbika yEpangelo tayi mana po omaliko getu giimuna noshowo oondjuhwa,’ Ndakukamo ta ti ngawo nokugwedha po ta ti oonime, ndhoka shito hadhi tila omililo dho wo kadhi lya oondjuhwa kwali, ngashiingeyi, kutya owa tema omulilo mpoka, opo ashike tadhi ya mpoka noku gu dhima nenge dhi ye sho mwa kalala nokudhima omaziko ngoka mwa li mwa tema,
ngeno dhi ye ondapo nenge dhi kale inadhi ya po mpu ne. Dho tadhi li mo oondjuhwa moohambo moka.
Sho The Namibian a ningi ekwatathano nOmunambelewa Omukuluntu gwEgameno lyUuntshitwe mOmbelewa ye mOngwediva, tate Evaristo Nghilai, okwa ti The Namibian na ninge ekwatathano nOmunambelewa Omukuluntu gwOshikunino shIinamwenyo omusamane Michael Sibalatani, ngoka e na Ombelewa ye
kOkaukuejo.
Sho twa dhengele Ombelewa ye ohela okwa tiwa kutya oku li niigongi kOvenduka. Elelo lya Ngandjera mewiliko lyOmukwaniilwa tatekulu Munkundi, pehala lyalyo lyene nopehala lyaaniimuna yalyo, otali indile kEpangelo, unene tuu kUuministeli wOmidhongoloko nOmatalelopo, ya tale nomeho omatiligane oshinima shika shoonime tadhi li po iimuna yaantu nokuninga po sha meendelelo ngashi tashi vulika manga iimuna yaantu inayi pwa po okulika po koonime nokiiyamakuti yilwe tayi zilile moshikunino shEtosha.