Oongundu odhindji niiyenditho ya gwedhwa po

OKOMMISI yOmahogololo ya Namibia oya kutu oongundu 112 dhokweenda opo dhi kwathele moku shanga aahogololi omanga omaishangitho iinaga pwa metitatu ta li ya.

Okomisi oya gwedha ko ishewe ootundi mbali kongulohi kiilonga yaanambelewa yomaishangitho.Elalakano oku sa oshimpwiyu kutya kehe gumwe ngoka a pumbwa okunyolwa okwa shangwa omanga omaishangitho inaa ga tya pehulilo mo 30 Septemba nuumvo.Okomisi yomahogololo ota yi ka hehela iiyenditho oku za komahangano gokuhehelitha iiyenditho, okomisi oya indile woo ekwatho oku za koohandimwe opo ye ya kwathele iiyenditho, konima sho epangelo inaa li gandja iiyenditho momwaalu gwa pumbiwa. Okomisi oya pumbwa iiyenditho ayihe kumwe 716 ndele epangelo olya gandja ashike iiyenditho 554 kolutu nduka.Pethimbo ta popitha aatolinkundana moVenduka metitatu omukuluntu gwoMahogololo, Moses Ndjarakana okwa ti oongundu dhokweenda 112 odha gwedhwa po oku nyola aantu pokati ketitano sigo etitatu oshiwike tashiya.’Kalunga ne tu kwathe’ osho a indile,neitaalo kutya ayihe ota yi ka enda nawa oku za ngashingeyi.Iikandjohogololo oyindji ina yi shangitha aahogololi omasiku gaali gotango oshiwike sha yi, omanga yimwe ina yi shangitha sigo omesiku etitatu, molwaashoka iipumbiwa yomaishangitho, ooprinta dhuukalata womahogololo, nokonyala etata lyiiyenditho 716 mbyoka ya li ya pumbiwa okweenditha nokufala iipumbiwa komahala kaya li po.Iipumbiwa yomaishangitho ina yi thika pethimbo molwaashoka opwa li ekanka lyaaniilonga yoshikondo shoompale pokapale koondhila ka Oliver Tambo moSouth Africa, omanga egandjo lyiiyenditho lya li lya ende kashona okuza kOoministeli dhi ili no dhi ili. Shika osha kateke ethiko lyaanambelewa pomahala mpoka ya li ye na oku ka longela.Iikandjohogololo mOmaheke, Otjozondjupa Kavango no Caprivi oyo ayike ya li ya tameke omaishangitho pethimbo.Omaishangitho oga tegelelwa ga hule 30 ga Septemba 2009 ndele shika ota shi ka kutha epangelo iimaliwa oyindji .Ndjarakana ka li ta vulu okutya iimaliwa ingapi oongundu ndhika dha gwedhwa po ta dhi ka longitha, ndele okwa ti epangelo oli ilongekidha oku mona kutya oshinakugwanithwa shika osha manithwa nawa.Okwa koleke kutya oombapila ndhoka dhi na omadhina 102 dha kana moshikandjohogololo sha Aminuis, Omaheke mehuliloshiwike, ita dhi imbi aashangwa mbaka ya ka hogolole, onkene ina ya pumbwa oku tila, shaa shi ota ya ka hogolola.Opolisi ota yi konakona oshinima shika , ndele oonakwiishangitha oye na uukalata wawo.Oombapila ndhika ohatu dhi longitha mokuthaneka noshowo moku tula uuyelele mbuka mookompiuta.’Otwe dhi pumbwa molwa embo enene lyaahogololi,’ Ndjarakana ta ti.Okwa ti omaishangitho,gaahogololi pondje yoshilongo nago ota ga ende nawa.Ekonakono lyelandulathano lyaahogololi ota li ningwa oku za mu12 sigo 16 ga Kotoba 2009, omanga oongundu dhopolitika ota dhi ka gandja omisholondondo dhookandidate dhadho mo 19 ga Kotoba 2009.