Oongundu dhopolitika noompango

KAPENA ongundu yopolitika nenge iilyo yayo ta yi ka pitikwa yi mbandameke oongundu oonkwawo pethimbo lyiikonga yomahogololo gopauperesinde naangoka goshigongi shopashigwana.

Omauthopamngo go kwiihumbata oga shainwa koongundu adhihe dhopolitika ndhoka ta dhi kutha ombinga momahogololo ga Novomba.Omauthopamngo ngaka ota ga ti kehe ehokololo lyo mambandameko noshowo iiningwanima yimwe kaa yi li pampango oyi na okutseyithilwa opolisi noshikondo shomahogololo , nehala mpoka iiningwanima mbika ya holoka nenge ya ningwa.”Emanguluko lyo ku ninga iikonga yomahogololo oyi li oshitopolwa shomahogololo gamanguluka noshowo ge na uuyuki.Kehe omuntu oku na uuthemba oku holola omadhiladhilo ge neitaalo lye lyopapolitika, shika ota shiningwa pwaana uumbanda womatilitho nenge womambandameko.Emanguluko lyopapolitika paku ninga iikonga yopolitika ota yi endele pamwe niinakugwanithwa, mbyoka ya kwatelamo oku simaneka uuthemba wa yalwe oku ulika omadhiladhilo gawo, noshowo emanguluko lyawo,’omauthompango ngaka taga ti.Omautho ota ga ti iilyo yoongundu dhopolitika ina yi pitikwa okuhumbata iilwitho nando oya sha uuna ta ya yi kiigongi yopolitika, kominyanyo nenge komahololo madhiladhilo.Oongundu adhihe odhi na okuyanda okuninga iigongi yadho popepyathane nopethimbo limwe mesiku limwe opo pu yandwe omaipumomumwe.Oongundu odha gana woo kutya ita dhi longitha omambako, kutya ga thikama nenge ngoka ge li miiyenditho pokati kootundi onti 21HOO notundi 7h00, molwaashika, shika ota shi yonagula ombili yaantu.Omauthompango geihumbato lyomahogololo ota ga utha kutya omupopi kehe poshigongi shopolitika oku na okulongitha elaka li li mondjila, oku na okuyanda okuhongakanitha aantu ya kondjithe yalwe.Oongundu odhi na okuyanda oku gandja iinyolwa mbyoka ta yi hongakanitha aantu no ta shi vulu oku fala mokukondja.Omautho ogo tuu ngaka otaga keelele iilyo yoongundu dhopolitika noshowo aayambidhidhi, ka ya piyaganeke iigongi yoongundu oonkwawo, ominyanyo, omahololomadhiladhilo, nenge woo ta ye ya keelele kaya ye kiigongi yoongundu dhawo, nenge oku yonagula po iishangwa yomahwahwameko yawo.Omautho ota ga indile aaleleli ya se oshimpwiyu kutya oongundu adhihe odha manguluka okwaadha omuntu kehe nelalakano oku ya lombwela shoka tadhi ningi,shika osha kwatelamo woo aaniilonga yomofaalama, naamboka haya longo momahala gepangelo konima yiilonga.Oongundu odha zimine oku egulula oompito dhomakwatathano pokati koombelewa oonene dhadho , oombelewa dhiitopolwa, naandhoka dhokomikunda, noshowo oku ulika aakwatakanithi mboka ta ya kala mekwatathano ethimbo alihe oku ungaunga nuupyakadhi mboka ta u vulu okuholoka.Aanambelewa ya uthwa otaya kala piigongi yopolitika oku tala kutya omautho ngaka otaga gwanithwa po, omanga aaleli yoongundu ota ya si oshimpwiyu kutya iilyo yawo ota yi iyutha komautho ngaka, noshowo ngele ita ye shi ningi nena aaleleli ota ya katu oonkatu opo ya se oshimpwiyu kutya kehe gumwe okwa gwanitha po shika.Oongundu odha uvaneke opo kaa dhi yonagule omudhingoloko noombapila dhadho dhoku hwahwameka aahogololi.