Oongombe dhimwe dhaanahambo dha monenwa ehala

AANAHAMBO ye li 38 lwaampoka yomwaamboka ya tidhwa moshitopolwa shUuninginino wa Kavango kuyele nuumvo ya monenwa omahala gokulitha iimuna yawo mOokamba dha NDC mOshitopolwa sha Mangetti nokwa tegelelwa ya ka tule oongombe dhawo mookamba dha NDC moka muule womasiku twa thinda mo.

Ndhika odha pewa Oshifo shika ku Amushanga gwEhangano lyAanahambao yAawambo mboka taya tidhwa mOkavango omusmaane Vilho Hamunyela, a tseyika nawa nedhina Kabila.
Omusamane Kabila ta ti kutya yamwe yomaanahambo mboka ya tidhwa kOkavango ye li 38 lwaampoka kumwe noongombe dhawo dhili 3466 lwaampoka oya monenwa omahala gomaulithilo mOofaalama dha National Development Corporation (NDC) kOshitopowla sha Mangetti.
Kabila ta ti aanafalama mbaka oya li ye na okutameka okuhinga oongombe dhawo mOsoondaha yohela yeti 17 Mei 2009, ashike oya ka lombwelwa kutya inaya hinga manga
molwashoka opu na ondhalate yimwe, ano ndjoka yomeni, inayi pwa okulongwa natango notaya ka tseyithilwa muule womasiku ngaka kutya ya pwa okulongwa na otaya vulu okuhinga oongombe dhawo ndhoka ye dhi fale koofaalama hoka.
Amushanga ta Kalelele mUuministeli wOmapangelo gOpaitopolwa, Omagumbo
nEhumithokomeho lyIitopolwa yokomikunda, Erastus Negonga, ngoka wo e li Omuunganekikuluntu gwIpambele yOmeya gEfundja moNooli, oye ta unganeke
oshinima shika shetulululo lyaanahambo mbaka taya tidhwa kOkavango niimuna yawo.
Kueyele mOshigongi shawo naanahambo mbaka pOndangwa, omusamane Negonga okwa tile kutya aanahambo mboka ya mona elago lyokutula oongombe dhawo mOofaalama dha NDC mOmangetti, oye na okukala ya mana okutula oongombe dhawo mOokamba nenge mOofaalama moka manga omwedhi nguka Mei inagu sa.
Omusamane Kabila ota ti aanahambo mboka ya mona elago lyokufala oongombe dhawo mOokamba dha NDC kOmangetti hoka, oye li yi ilongekidha nale, noya tegelela ashike mboka taya pangele ondhalate ya kale ya mana, nage oya pewa elombwelo, kehe ethimbo pyi ilongekidha okuhingila oongombe dhawo koofaalama hoka.
Kuyele omusamane Negonga okwa tile kutya aanhambo mboka taya ka mona elago lyokutula iimuna yawo mookamba dha NDC, unene tuu oongombe, otaya ka kala mo ashike uule wokathimbo ka ngambekwa, manga Epangelo, unene tuu Uuministeli wOmavi nOmatulululo, tau longekidha po sha shoka tashi ka gandja ompito kaanahambo mbaka ya vule okutula mo iimuna yawo tashi kalelele. Nande ine shi popya mo sha yela, oonzo otadhi ti kutya Epangelo, ano Uuministeli wOmavi ou na po edhilaadhilo lyokutendulula oofaalama oonene dhokOmangetti muufaalama uushona opo aaniimuna ayehe mboka ye li kuuzilo wOndonga hoka, ya mone omahala gokulitha iimuna yawo.
Negonga okwa li wo a gandja omayele kaanafaalama aanene yokOmangetti ngeno ya ka lande Oofaalama muushimba. Moku shi ninga, omunafaalama gwokombinga yOwambo, oku na tango okulanditha po iimuna ye , ta mono oshimaliwa shoka taka landa nasho iimuna mbyoka taka tula mOfaalama ye yomuushimba molwashoka omuntu ito vulu okuhingila oongombe dhi na omwenyo moshitopolwa shuushimba okuza koshitopowla shokOwambo.
Kwa tilikwa omukithi gwiimuna, ano taku yiwa kutya oongombe dhokoshitopolwa shokonooli yokandjila komusinda omutiligane odhi na okukithi.
Aanafaalama oyendji yokombinga ndjika yokOwambo, ano yokOmangetti, itaya tsu naanaa kumwe noshinima shika, onkee ye na uudhigu okukalanda oofaalama kombinga yokuushimba.
Kakele kaanahambo mboka ya mona elago okutula manga iimuna yawo moofaalama dha NDC kOmangetti, yamwe yomuyo mboka inaya mona omahala oye na okutegelela shoka tashi ka ningwa po kEpangelo muule wethimbo twa pita mo. Kuyele Negonga okwa tile kutya oyendi oyo inaya mona mpoka taya tula manga iimuna yawo, nokwa li a indile kaanafaalama yamwe kombinga yokOwambo, ya tale ngele itaya vulu okweedhilila yakwawo manga mboka manga Epangelo tali ningi po omalongekidho, ngoka tashi vulika ga ka uvithe ayehe ombili.Kuyele okwa lopotelwe kutya oongombe adhihe kumwe dhAanhambo aapopi yOshiwambo ndhoka dha kala tadhi tidhwa mOkavango odhi li 60,000 lwaampoka, ashike pamayalulo gahugunina komusamane Negonga, oga ganbdja ashike omwaalu gwoongombe 7000 lwaampoka.