Oondjuhwa dha lika komaima pOmatala ga Shakati

AANANGESHEFA yoondjuhwa pOmatala ga Shakati oye li muumbanda nomelimbililo enene lyoondjuhwa dhawo dha tameka okulika po komanima uusiku, ngoka taya ti kutya kaye shi naanaa kutya omakwashike.

Meme Selma Amupanda ota hokolola kutya okwa likila oondjuhwa ndatu ne lwaampoka, okupendukila ongula yohela mEtitatu omanga dhilwe ne (4, dhe nomulandithi omukwawo me Teresa Linus,) dha kana mo moshimbamba moka hadhi kala noonkwawo. Ta ti ndhoka ya adha po mbali ndatu lwaampoka, dha lika dha sa, odha tsuwa ashike omayego nokuthigwa mpoka. Inadhi lika po thiluthilu. ‘ Ndhoka dha kana, kandi shi nee kutya odha lika po thilu nenge odha yiwa nomwenyo gwadho,’ meme, Selma ta ti ngawo nokugwedha po kutya osho oshikando shotangotango oondjugwa dhawo tadhi ponokelwa nokulika po ngawo komanima kage shi wike. Ta ti sho ya konaakona, oya mona kutya omanima ngoka oge na omakaha ga fa goombwa. Meme Selma, ngoka a ti kutya oondjuhwa dhawo ohaye dhi tula momambamba ga tatwa nawa noongodhi itadhi vulu okutokoka nuupu, ta ti, omanima ngoka sho ge ya pomambamba mpoka oga yi pu limwe lyuudha oondjuhwa nokutokola ko oongodhi ndhoka, ano dhe dhi lumata ko nosha ningi ombululu, mpoka ga pitithile nee oondjuhwa, yimwe nayimwe noku dhi dhipaga po ngawo. Ngiika dho tadhi li po nee ndhiyaka ne, nenge dha yi nadho, shoka inatu adha po naanaa ngeno omalwenya gadho.Meme Ndapewa ya Jona ngoka wo e li omunangeshefa gwoondjuhwa pOmatala ga Shakati mpoka nayakwawo mbaka, ota ti kutya ngeno oondjuhwa dhawo otaya kala ngaa haya shuna nadho komagumbo, kOshikango shomoshakatiuninginino moka ye li, ashike nee odhindji okuhumbata nohaya tokola ashike ye dhi thige pOmatala mpoka noku dhi adha ngula sho taya ye ya okutsikila nongeshefa yawo ngawo. ‘Otatu tala ngaa sho tatu ningi po, unene tuu ngele omanima ngoka oga geye nokutsikila oku dhi dhipaga po ngeyi. Meme Selma ota ti oondjuhwa dhawo ndhika ohaye dhi landitha po kooN$65 nange omakondombolo omanene, otashi vulika ye ga landithe po kondando yi vule po pwaandjika. ‘ Otatu kanitha lela notu na okuninga po sha opo oondjuhwa dhetu kaadhi like po nokukana ngeyi,’ meme Selma ta ti ngawo.