Oondjindikila otadhi ka kwata natango ethimbo

JOHANNESBURG – Epangelo lyAamerika mEtine lya zi ko olya ti kutya natango opu na etimbo ele oondjindikila dhoka lya ningile Zimbabwe dhi ka kuthwe po.

Omasiku ga zi ko, Omupresidende Robert Mugabe okwa li a ningi eindilo ku Amerika a kuthe po oondjindjindikila dhoka a ningile Zimbabwe.
‘Inatu mona natango uumbangi wa gwana okuza kEpangelo lya Zimbabwe kutya oye li mondjila yokweetapo Epangelo li li nawa lya kwatela mo ayehe,lya simaneke uuthemba womuntu nOveta,’ Omugandjimulombo gwEpangelo lyAamerika, Robert Wood, osho a lombwele iikundaneki.
Metine lya zi ko, Mugabe okwa li a ningi eindilo kEhangano lyUukumwe wAaEuropa/European Union (EU) nokEpangelo lyAamerika, li kuthe po eindiko lyegandjo lyOovisa kiilyo yimwe yopaati ye nosho wo oondjindikila dhopalike dhoka ya ningile Epangelo lye.
Mugabe, ngoka a li a thiminikwa a eta po Epangelo lyopaukumwe mu Zimbabwe (moka ye li ya topolelthana oonkondo na Morgan Tsvangirai), okwa ti Epangelo lyOpaukumwe olya tameke noonkambaddhala dhokweeta eliko lyoshigwana kuuwanawa.
Ihe Wood okwa ti Oshikondo shIikwaponge shAamerika ina li tala nokuli keindilo ndika. ‘Tse katu li moonkundathana nEpangelo lya Zimbabwe shi na sha nokukutha po oondjindikila (dha yamwe,’ Wood osho a popi ngaaka.
Okwa tsikile ko kutya Amerika oku li natango i ikwata onkalo moka mu na AaZimbabwe, mboka ya li kala ye li muupyakadhi mbuka uunene.
‘Ota tu tsikile nokukwathele AaZimbabwe,’ ta gwedha po ngaaka. Okuza momumvo 2002, Amerika na EU oya indike Mugabe niilyo yilwe iikuluntu yOpaati ye okuya miilongo yAaEuropa nokwAamerika, molwashoka aniwa opaati ye oya li ya ningi iinima kayi li pauyuuki momahogololo nosho wo ya yonagula uuthemba womuntu.
– ZimOnline