Oondjambi dhaaniilonga yEpangelo otadhi ka gwedhelwa

EPANGELO otali ka gwedhela oondjambi dhaaniilonga yEpangelo noshimaliwa shoopelesenda 24, shoka tashi ka pula Epangelo oshiliwa shOondola obiliona yimwe.

Pethimbo ndika, Epangelo oli na aaniilonga ye li 84 000. Shika osha tseyithwa kEpangelo mEtitano, konima sho osipana yEpangelo (yi na sha nomagwedhelo goondjambi) naakalelipo yomahangano gaaniilonga gaali, ya li ya kala moonkundathana kombinga yoshinima shika. Aakombi naaniilonga yalwe mboka haya mono oshimaliwa polevela 1A nolevela B,oondjambi dhawo otadhi ka gwedhelwa noopelesenda 24. Pamayalulo gopatemeko ngoka ga ningwa po, ogu ulike kutya Epangelo otali ka za oshimaliwa shOondola obiliona yimwe mu shika, inamu kwatelwa iimaliwa yomalweendo noyomekutu yaaniilonga yEpangelo (uuna taya zi po niilonga). Sho Epangelo lya li lya gwadhele oondjambi dhaaniilonga yehe yEpangelo noopelesenda 2,85 momumvo 2000, osha li sha pula Epangelo oshimaliwa shOondola tadhi ihilile poomiliyuna N$140, shoka sha li sha tula pombanda oshimaliwa shoondjambi dhaaniilonga mEpangelo noopelesenda heyali.
Membo lyOmulekeneno lyoshimaliwa shomumvo 2006 sigo 2007, Epangelo olya li lya pumbwa oshimaliwa shOondola oomiliyuna N$196, shoondjambi dhaaniilonga.
Omolu oshimaliwa shika oshindji Epangelo tali ka za mokugwedhela oondjambi dhaaniilonga, oshi li sha yela kutya ota li ka konga po oonzo dhilwe dhoshimaliwa opo li vule okutula miilonga ooproyeka dhalyo dilwe.
Shika oshikando shotango sho oshilongo sha manguluka, Epangelo lya sile ohenda noonoondo aaniilongo yalyo.
‘Shika osha ningwa ashike patompelo ndika kutya, itashi ka kala shu uka okukala inaya mona egwedhelo ndika, konima sho maanapolitika ya pewa oopelesenda 24,’ onzo yimwe yomauyelele osho ya popi ngaaka.
Egwedhelo lyoondjambi dhaaniilonga ndika inali etwa naanaa aniwa koonkondo dhomahangano gaaniilonga ga kala taga kondjo ga hala oondjambi dhawo dhi gwedhelwe, ihe olya etwa kethimbo lya puka mpoka Egumbo lyEpangelo lya gwedhele oondjambi dhaanapoliyika.