Oondjamba momawendo poNkurenkuru

OSHILANDO sha Nkurenkuru shili ookilometa 140 kuuninginino wa Rundu moKavango osha talelwapo kookahenge, ndjamba mupaula shihwa ongula yomaandaha oshiwike shika.

Oondjamba 13 ndhoka dha zi moAngola odha hili oshigwana oshindji shomoshilando shika, nosha tilitha woo yamwe.Oondjamba odha taaguluka omulonga gwaKavango okuza moshi, shiindalongo Angola, oshoka omeya momulonga oga ninga omafupi.Aakalimo yomoshilando, mwakwatelwa naanona yomanongelo naalongi yawo oya li ya kumwa okumona oondjamba ndhoka popepi noshilando.Oya thigi po ootundi niilonga yawo mbyoka ya li ta ya longo no ya yi ya ka tale nawa iinamwenyo mbika sho ta yi napa momawendo goshilando shoka.Oondjamba dhilwe 11 odha li dha thikama kontuntu yili popepi nofaalama yoohi ya Mpungu konyala etata lyokilometa okuza pomawendo.Aantu yamwe mboka ya li yena okufumvika aasi yawo mpoka esiku ndyoka, oya li yena oku tegelela okathimbo opo ye shi ninge oshoka oondjamba odha li popepi nokulya komano gomuthiya nokiihwa yilwe mbyoka yi li mpoka.Omunambelewa gwoshikondo shOmudhingoloko nomatalelopo, Kenneth Tapiso okwa ti oondjamba odha ka thiga po ehala konima sho aanambelewa yuushitwe ya umbu oondjembo mombanda noku dhihalutha. Okwa ti natango oondjamba odhi li popepi na Nkurenkuru, ndele odhi li kontuntu pondje yoshilando, hoka tadhi napa nokulya omanenge niihwa yilwe.Pahapu yaakalimo yomo Nkurenkuru shika osho shotango konima yemanguluko oondjamba tadhi talelelpo oshilando shawo.