Oondholongo dha nkondopeke eilongekidho kombinga yekunku lyoH1N1

AANIILONGA yUukalinawa moshikondo shezulonkalo ota ya ilongekidha opo ya keelele omukithi gwekunku gwa ye moondholongo.

Eilongekidho ndika olya landula sho omwaalu gwaantu mboka ya alukwa uuvu mbuka gwa londo pombanda niiningwanima 54 oku za mu Juli nuumvo.Elalakano lye ilongekidho ndika olyo oku sa oshimpwiyu kutya mboka ya edhililwa momazulonkalo oya gamenwa komukithi nguka, unene oku shi talela monkalo ye udhililo moka oyendji ye li mo.Poshigongi shongundu yo NHEMC omukuluntu gwoshimpungu shUukalinawa mOshikondo shOondholongo nezulonkalo,me Angeline Kauraisa okwa tsu omuthindo nkene sha pumbiwa opo oshikondo she shi kale shi ilongekidha nawa, moku shi talela monkalo yomahala ngoka.’Osha simana tu kale twi ilongekidha omolwa onkalo ndjoka ya thinana. Otwa hala pu kale omukalo nkene ta tu vulu okwiikalekela mboka taya ehama, ngele pamwe uuvu mbuka owa holoka.Otu na wo okukala tu shi nkene ta tu konakona aakalimo yomoondholongo,’ Kauraisa tati.Namibia oku na aakalimo moondholongo, nomoonzulonkalo ye li lwopo 5 000, nolundji okwa pewa uusama molwaashoka omahala ngaka oga udha sha pitilila.Oku shi talela meudho lya tya ngaaka, nontseyo kutya uuvu wekunku oha u taandele ngele ope na uupopepi nomunuuvu nena otashi kala oshipu opo uuvu mbuka wu indjipale mbala momahala ngaka.Kauraisa okwa gandja omalandulathano gopakathimbo nkene oshikondo she shi ilongekidha okuninga ngele omukithi nguka ogwi iteyele moondholongo.Okwa pewa woo eyamukulo kombinga yosheetwa po she, okuza komunashipundi sho NHEMC omundohotola Jack Vries.Okwa inekela omathaneko ge okuyamukula ekunku moondholongo ga ka kale ga taambwako kUuministeli Wuukalinawa omanga inaaga agandjanekelwa moondholongo adhihe moshilongo.Omathaneko ngoka ga tulwa kumwe palongelokumwe nehangano lyUundjolowele mUuyuni WHO, oongoka ga kwatelamo nkene omukithi nguka ta gu dhimbululwamo,nkene ta gu yandwa, nkene taku monika mboka taya ehama ku gwo , nkene ta gu pangelwa na nkene mboka yakwatwa taya ikalekelwa, nonkene aaniilonga yomoondholongo ta ya gamenwa kaa ya kwatwe kugo.Iikondo yoondholongo muuyuni auhe oyi li yi ilongekidha kombinga yekunku.Miilongo yimwe oya yi sigo oompoka kutya oya topola aanandholongo moongundu dhaamboka taya ehama naamboka ye na uundjolowele, okuyeleka netopolo lyaanandholongo shi ikwatelela komayono gawo.Oondholongo odhi na woo iilongitho ya gwana yokwoopaleka oku keelela ombakiteli noovirusa dhi indjipale momahala moka.Oondholongo oha dhi ikalekele woo mboka ta ya ehama, noshowo okungambeka omainyengo gaakalimo mboka ya li mekwatathano naantu mboka taya alukwa.Omatalelepo na go pomathimbo gamwe oga kuthwa po. Mbika oyo iiholelwa yimwe ta yi ningwa palwe muuyuni mbyoka oshikondo shoondholongo sha Namibia ta shi vulu okutula miilonga.Okwa itaalwa kutya ekunku oha li falwa moondholongo kaaniilonga yondholongo, kaatalelipo, noshowo kaanandholongo aape.Kauraisa okwa gwedha po tati kakele ko ku longa aaniilonga moondholongo nokukonakona aakalimo aape manga opo taya taambwa, aatalelipo nayo oya pumbwa okulongwa noshowo okutseyitha ngele ota ya alukwa ekunku.Okwa ti okwiinekela kutya aaniilonga yoondholongo otaya pewa woo elongo kombinga yekunku lyo H1N1 kakele kelongo ndyoka haya mono shina sha nuundjolowele.Aapangi naanambelewa yuukalinawa moondholongo otaya ka pewa elongo kombinga yoH1N1 moshigongi iilonga pehulilo lyomwedhi ngu.Okwa ti sigo oompaka ina pa tseyithwa pu na ando ondholongo yontumba pwa monika omuvu ta alukwa ekunku.Sigo oompaka aavu kumwe 54 ya pangwa omolwa ekunku lyoH1N1 moNamibia, nomuntu gumwe a sa komukithi nguka. Oosampula 40 natango odha tegelela omayamukulo.