Oondando dhiikulya tadhi ka lyapo iimaliwa yoyendji

AANAMIBIA oya tegelela oku longitha oshimaliwa oshindji nuumvo okwiipalutha. Ndika olyo elondodho lya zi kaanawino momahupilo yomoshilongo sho ya ti oondando dhiikulya otadhi londo pombanda nuumvo muuyuni auhe.

Omunawino gwomahupilo mombaanga ya FNB, Daniel Motinga okwa ti Namibia oku na oku gumwa ko nkalo yoondando dhiikulya dhili pombanda. Omanga Emile van Zyl gwehangano lya Simonis Storm Securities na ye okwa zimine kutya shoka osho shina okukala.Nonando aalongithi yepungu moNamibia oya gamenwa oshoka ondando yepungu oha yi kondololwa okukala pomuthika gwontumba, ndele kombinga yiikulya yimwe oondando otadhi kaya pombanda lela. Omunawino gwomahupilo gwombaanga ya Venduka John Steytler okwa ti molwaashoka Namibia oha landa iikulya ye oyindji oku za pondje shika oshe mu tula monkalo ombwinayi kombinga yoondando dhiikulya.Aatseyi yomahupilo muuyuni oya lulilwa okuza tuu sho oshiyelekitho shoondya shehangano lyoondya muuyuni nenge FAO sha ulike kutya oshili pombanda okuyeleka naashoka shomumvo 2008 uuna ndoka oondando dhiikulya dha li dha londa noonkondo muuyuni, naashika osha etele omakuyunguto miilongo yimwepo. Omiyalu dha gandjwa kombelewa yomayalulo yopokati odha ulike kutya oondando dhiikulya odho dha undulile omuthika gwengushuluko gu ye pombanda mu Novomba, sho omuthika nenge ondjele ndjoka ya li ya thikama pooperesenda 3,7 oku za pooperesenda 3,2 momwedhi gwa Kotoba.Engushuluko mondando yiikulya lyokomumvo olya li lya inyenge okuza poperesenda yimwe oshinkwanu heyali okuya poopersenda 2,4 mu Novomba. Ondando yomboloto noshowo yiilya oya yi pombanda mu Novemba okuyeleka na Kotoba. Aanawino oya ti nonando oondando dhiikulya kadhili pombanda okuyeleka naandhoka dhomumvo 2008, otashi ka kutha woo ethimbo kashona opo oondando dhatya ngaaka dhi londe sigo opo muthika ngoka.Aanawino oya londodha kutya omagumbo ngoka ge na iiyemo iishona ogo taga ka kala nuudhigu molwa oondando dhiikulya, oshoka omagumbo ogendji moshilongo ohaga longitha ooperesenda 30 dhiiyemo yago okulanda iikulya.