Oondando dhiikulya dhuuka pombanda

IIGWANAHANGANO oya londodha kutya aantu oyendji ota ya ka sa ondjala molwaashoka oondando dhiikulya odha londo pombanda.

Omunawino gwomahupilo mehangano lyiikulya mUuyuni, Abdolreza Abbassian okwa ti unene oondando dhomagadhi gokulya, iilya, noshowo osuuka otadhi ka guma aantu oyendji. Oshiyulikithi shoondando dhiikulya sha FAO sha Desemba osha thika piitsa 214, 7 ondjele ndjika oyi li pombanda unene okuza nkene tuu ehangano ndika lya tamekele okuninga omatulokumwe gondando dhiikulya momumvo 1990. Ondjele ya Desemba yomumvo gwayi oya pitile ndjoka ya li ya talikwa oyo yili pombanda momumvo 2008 ndjoka ya li yathikama piitsa 213,5. Oondando dhopombanda dhiikulya odha li dha fala momakuyunguto miilongo yAfrica, mo Haiti nomo Philipine, nomahangano gomakwathelo oga londodha kutya otashi vulika oondando dhi fale momakuyunguto nelongitho lyoonkondo. Ondando yo suuka muuyuni oya li ya yalulwa piitsa 398,4 oku za piitsa 373,4 mu November gwomumvo gwayi. Ondando yiilya nayo oya londo pombanda sigo opiitsa 237,6, ondondo yi li pombanda nkene ndjika ya monikilwe mu Auguste 2008.Omuwiliki gwombaanga yUuyuni, Robert Zoellick okwa ti oondando dhopombanda dhiikulya odhi li oshitilitithi mekoko lyuuyuni noshowo mengungumano lyopankalathano.