Oonakuningwa oihakanwa kuAmushelelo otava ka mona oimaliwa yavo okupitila komhangu

… Omutamanekindjai okwa ti okutamanekwa
oku kaku na sha nounandjungu waye

Omutamanekindjai Martha Imalwa okwa ti ovanhu ovo va kanifila oimaliwa moproyeka yaMichael Amushelelo yedina Project One Milllion otava ka mona ashike oimaliwa yavo ngee ova koleke kutya inava kufa ombinga moimbuluma ei.

Amushelelo Omaandaxa okwa ti oproyeka yaye yoProject One Million okwa li i na ovanhu ve li lwopefele ovo va ka ninga oihakanwa yoita yopapolitika oyo i li pokati kaye “nepangelo loulingilingi”.

Eshi a popya noThe Namibian Omaandaxa, Imalwa okwa ti ovo kwa li va yandja oshimaliwa shavo nava ye komhangu noumbangi wavo oo tau ulike kutya okwa li va tula oshimaliwa shavo moproyeka ei shili.

Okwa ti eemiliyona N$13,2 odo da hangika kombaanga yaAmushelelo itadi longifwa po nande kepangelo fiyo ovo va kanifa oimaliwa yavo ve ya poluheela. Imalwa okwa ti omaliko aAmushelelo oo a kufwa ko kepangelo, ngaashi omatuwa aye ongushu e li aheyali, otaa ka landifwa po komunambelewa a ulikwa komhangu.

“Paveta, ngee omunhu oku na mo omauwa, oihokolola aishe okwa li ya nyanyangidwa moifokundaneki, tai pula ovo ve na mo omauwa va popye. Vamwe ova yandja ouyelele tau pula omhangu opo iha kwatele mo oimaliwa yavo momaliko oo taa kufwa ko kepangelo.”

Imalwa okwa ti eindilo lokuhakwatela mo oimaliwa yovanhu ovo kakwa li la ungaungwa nalo oshivike sha dja ko mepangulo lomhangu yopombada.

“Natango otashi ya ndee otashi ke likolelela kouyelele wetu. Oshe likolelela ngee omunhu naye okwa li e shi shi ndee ta kufa ombinga moshimbuluma. Ngee owa kufa ombinga ito mono omauwa, ashike ngee okwa li ashike omunhu uhe na ndjo nena oumbangi opo tau kala, owa twala nale oshibofa shoye komhangu. Onghee nee, natango ohatu ka ungaunga nokuhakwatela mo oinima yovanhu ovo vehe na ondjo,” Osho a ti ngaho.

Ouyelele wokuhakwatela mo oinima yovanhu ovo vehe na ondjo okwa li wa yandja koshi yokatukulwa 52(3) kokatendo kokukelela oimbuluma ya longekidwa.

Omaliko aAmushelelo oo a kufwa ko kepangelo itaa kumwa manga ile a ye moshikefa shokwaalula omaliko fiyo oshinima eshi shokuhakwatela mo oinima yovanhu ovo inava kufa ombinga moshimbuluma omu otashi ungaungwa nasho.

Amushelelo okwa li ta kwatela komeshe Project One Million pokati komudo 2018 fiyo 2019.

Ovakwashiwana vati ova futa oshimaliwa shi fike peemiliyona N$87, omhangu yopombada yaVenduka osho ya mona Etitano la dja ko.

Omahauto ondilo e li aheyali taku feekelwa kutya okwa li a landwa noimaliwa imwe ya dja momukalo wokukengelela okwa li a kufwa ko kepangelo.

“Amushelelo okwa li ta kwatele komesho oshinima eshi shokukengelela ovanhu. Ovanhu vamwe otava tula mo oshimaliwa. Oshimaliwa osho a mona osho a longifa okufuta vakwao novanhu vamwe vape otava tameke okuuya mo. Osho twa hanga kombaanga kashi shi oimaliwa aishe. Owa mona kutya meindilo lange oshimaliwa shi fike peemiliyona N$60 okwa li nale sha futwa ovo kwa li a pumbwa okufuta.

“Ngee owa tula mo oshimaliwa tete, oho mono omauwa, ashike natango ovanhu vamwe ova kana shaashi oimaliwa imwe okwe i longifa po okulanda oinima yaye yopaumwene, mwa kwatelwa oyeendifo. Paife, opu na oimaliwa yovanhu vamwe i na okukala ihe po notu na okutala eshi hatu ka popila eindilo letu lokuhakwatela mo oinima yovanhu ovo inava kufa ombinga moshimbuluma omu. Otu na okulonga noshikumungu eshi shokutya olye a kanifa shike, olyelye a mona omauwa, opu na oshimaliwa shi fike peni, ingapi ina okufutwa? Osho oshi na okuuya poluheela,” Osho a ti ngaho.

Imalwa okwa pula Ovanamibia opo va ninge omapekapeko omanga inava tula oimaliwa yavo meeproyeka doludi eli. Okwa ti oimbuluma kai na eshi hai eta po.

“Ino lipula kutya oto waimine oimbuluma opo u mone mo sha. Omahangano okukwatela po oveta oku na okukushikula.”

Okwa pula Ovanambia opo va kale ve na oshili opo vaha kufe ombinga moinima ya pamba oimbuluma.

Okwa nukila pomutenya kutya epangelo itali tamaneke Amushelelo molwounandjungu waye wopapolitika.

“Ihatu fininike ovanhu. Ohatu fininike ashike ovanhu ovo va kufa ombinga moimbuluma. Eedula adishe odo onda kala omutamanekindjai, kapu na omunhu ta ti ‘okwa li nda monika ondjo shaashi Imalwa okwa li ta longifa omatomeno opapolitika ile shike’,” Osho a ti ngaho.

Okwa ti okwa koleka oibofa yaye she likolelela koumbangi.

Imalwa okwa weda po vali kutya ngeno kakwa li pu na oumbangi ngeno ina tamaneka Amushelelo.

“Oumbangi opo u li,” Osho a ti ngaho.

Nande ongaho, Amushelelo okwa ti oku na ehalo lokufuta ovanhu vaye okupitila mwaasho hashi ifanwa oforex.

“Eeno, otwa mona omatilifo a yooloka, paushili ovanhu vetu vamwe ove tu twala komhangu,” Osho a ti ngaho.

Amushelelo okwa ti vali oku na ondunge yokuninga eindilotalululo letokolo eli.