Oonakulwa aakulu oyendji otaya taamba oodola 2000 komwedhi

KONYALA omwaalu omunene gwoonakulwa aakulu ohagu taamba eyambidhidho lyoodola 2000 okuza kuuMinisteli woonakulwa aakulu omwedhi kehe.

Oonakulwa mbaka oya tegelela ishewe eyambidhidho lyuunamiti, lyoshali, omwaalu omunene tagu ka futwa palumwe inaagu tseyika, ekwathelo lyokufutila omeya nolusheno, okufutila egumbo na ishewe otaya vulu oku gandja omathaneko gooprojeka dhongushu yoodola 200 000 kepangelo.Minista gwoonakulwa aakulu, omundohotola, Nickey Iyambo okwa popi ndhika konima yoshigongi she noonakulwa aakulu moKeetmanshoop etitano lya yi.Oshigongi shika, osho oshitopolwa shetalelopo lye lyoku tseya aantu ye mboka ta ya adhika muumbugantu woshilongo.Iyambo okwa ti oonakulwa aakulu mboka ya gandja omathaneko gooproyeka opo dhi pewe oshimaliwa otaya ka pewa ashike ooperesenda 10 dhiimaliwa mbyoka yoproyeka omanga mbyoka ya hupu ko ota yi futwa mboka ya gandja omayakulo, okwa gwedha ko ta ti aantu ashike mboka ye na uulema naamboka ya kulupa oyo taya pitikwa oku pewa ewatelo lyomagumbo.Iyambo okwa lombwele oonakulwa aakulu kutya ina pa tokolwa natango kutya omwaalu ogu thike peni ngoka tagu pewa oonakulwa aakulu noshowo kutya oolye ta ye gu pewa.’Oonakulwa yamwe oye shiwike nayalwe ka ye shiwike’osho a ulike.Okwa endulula kutya omwaalu ngoka ta gu ka pewa mboka ya tothwa mo moonakulwa aakulu otagu gandjwa ongo endhindhiliko lyoku pandula shoka mbaka ya ningi po, sho ya kutha ombinga mekondjelo manguluko lyoshilongo.Iyambo okwa lombwele oonakulwa aakulu kutya oku shi shi kutya yo oya hala uuministeli we wu endelelithe eshango lyawo, noshowo efuto lyomwaalu ngoka omunene.Okwa gwedha po tati opena woo eitaalo mokati koonakulwa aakulu kutya ayehe oye na okupewa omwaalu ngoka gwoodola omayovi gaali komwedhi.Mongashingeyi oonakulwa ashike mboka yaana iilonga naamboka ye na iiyemo iishona komwedhi oyo taya futwa oodola 2000.Iyambo okwa yelitha ishewe nawa kutya mboka taya talika ongo oonakulwa aakulu oomboka ashike ya kuthile ombinga mekondjelomanguluko pondje nomeni no ya li ya hogolola momumvo 1989.Euveko kutya mboka ya li kombanda mekondjo oyo ayeke ya talwako ongo oonakulwa aakulu ka li shi lyoshili. Okwa ti nakulwa omukulu, omuNamibia kehe ngoka a li ta kondjitha uupiyapika meni nokombanda yoshilongo.