Oonakulwa aakulu otaya ka futwa

OONAKULWA aakulu ye li 500 lwaampoka otaya ka futwa oshimaliwa shOondola omayuvI omilongo ntano (N$50 000) kehe gumwe, konima sho Omutumba gwOpashigwana gwa zimine Embo lyOshimaliwa shOmulekeneno gwEpangelo mEtine lyoshiwike sha zi ko.

Uuministeli wOonakulwa Aakulu owa ikalekela oshimaliwa shOondola oomiliona omilongo mbali nantano momumumvo 2009/2010, ihe oshimaliwa shika otashi ka adha ashike kaantu ye li 500 lwaampoka, yomoonakulwa aakulu ye li 40 000 mboka ye li moshilongo ashihe.Ominista yUuministeli wOonakulwa Aakulu, Ngarikutuke Tjiriange okwa ti yo oya mona omaindilo ga thika po 38, ihe omaishangito oge li natango taga tsikile.’Molwashoka aantu ye li 40 000 lwaampoka oya li ya galukile kegumbo momumvo 1989, okwa tegelelwa gu ka konde po 40 000, molwashoka oonakulwa aakulu ayehe kaye shi aagaluka. Oonakulwa aakulu yekondjelomanguluka, oomboka ya li miita yekondjelomanguluko pondje yoshilongo naamboka ya li ya kwatele komeho ekondjelomangulukla ye li meni lyoshilongo,’ Tjiriange osho a popi ngaaka. Okwa ti Uuministeli we owa kutha mo aantu mboka ya kulupa noonkondo, oyo ya pewe tango oshimaliwa na okwa tegelelwa oshimaliwa shika shi ka adhe pOondola oomiliona omilongo ntano nenge pOondola oomiliona ethele omumvo tagu ya.Pethimbo ndika, Olaata yOnakulwa oya ziminwa omaindilo ge li 3 506 ong’ngoka ga zi kaantu ye li shili oonakulwa aakulu omanga ge li 108 ga ga li ga shunithwa po. Omadhina ge li 8 2 000 oga tulwa moshimaliwa shOondola/N$2 000 shoka haya mono. Omumvo gwa zi ko, Oparliamende oya li ya zimine eteokolo kutya okamaliwa hoka haka futwa oonakulwa aakulu komwehdi kOondola/N$500 naka tulwa pOondola omayuvi gaali.Tjiriange okwa ti opwa li uunima umwe mboka wa laateke egwedhelo lyoshimaliwa shika molwashoka egwadhelo ndika olya li li na okutameka mu Apiilili gwomumvo gwa zi ko.Shika osha ka eta nee oonakulwa yamwe aakulu ya kala taya futwa oshimaliwa shi li konima. Tjiriange okwa ti aakondjelimanguluko ayehe oya shangwa,inaku talika kutya oye li moongundu dhini.Okwa ti Epangelo olya mona wo oplota yimwe moshitopolwa sha Caprivi moka oonakulwa aakulu taya ka longa iikulya. Tjiriange okwa ti yo oya hala okumonena oonakulwa aakulu iilongao, opo ya mone oshimaliwa. ‘Ndika oli li ashike etameko, ooproyeka dha fa ndjika otadhi ya. Otwa hala wo okuya mUunfaalama woohi nomUunamina. Ota tu ka pula Uuministeli oofaalama dhi pewa oonakulwa aakulu,’ Tjiriange ta popi. Nande ongaaka, Tjiriange okwe shi zimine kutya oonakulwa aakulu yamwe oya fa inaya hala ooproyeka noya hala ashike okupewa oshimaliwa, omolu ooproyeka moka ya li nale ngashi ndjoka ya Dvelopment Brigade Corporation, ndhoka dha ka kuthwa po sha etwa kewiliko lya nkundipala.