Oonakuhepekwa komeya taya li li kondjala

NONANDO pu na aagandji yooshali oyendji ya kala taya gandja omagano, unene tuu giikulya koonakuhepekwa komeya gefundja mOnooli, oonakuhepekwa komeya gefundja mOshakati, mboka ye li kOsenda ya Shoopala nEkuku n oshowo mboka ye lo kOsenda ya Mungwelume moshitopolwa sha Hangwena oye li taya lili kondjala, mboka yomOshakati, taya ti kutya hela ngaa ya falelwe ko mu Febuluali nuumvo ya pewe iikulya, oye yi uvite ashike tayi ganndjwa ngokatana komiilya.

Oonakuhepekwa komeya gefundja mOshakati mboka ye li kOshoopala nokEkuku, otaya ti kutya shonuumvo osha mana oombata, oshoka kapu na ashike ngoka e na nayo hela ya yile ko kOosenda hoka, oye li ashike kuyo yene. taya ti kutya yamwe aniwa yomElelo lya Shakati, oye ya lombwelele kutya itaya pewa iikulya m olwashoka oye li mondoolopa nomomudhingoloko gwawo.
Taya ka lombwelwa po aniwa ishewe kutya mboka ye na iilonga ye li mOotenda moka oyo ashike taya pewa iikulya naamboka kaye na iilonga naya shune komagumbo gawo gomiti kiitopolwa nokomikunda dhawo hoka ya zile sho ye ya kOshakati.
Aanangeshefa yamwe yomOshakati nayo oye uvite uudhigu, taya uhala taya gandja iikulya yomausila gomapungu, omapakete goondooha dhoohi, omapakete gomagadhi gokuteleka, oothewa, omapakete guulehite nogomongwa noshowo omasiga gokutelekela, omiyti dhoomwe noonete dhoomwe nosho tuu ndele iinima mbyoka nani ihayi pewa Ookastoma dhawo dhi li muupyakadhi wondjalanokulika koomwe.
Oonakuhepekwa komeya gefundja yomOshakati mbaka, otaya ti kutya edhilaadhilo lyokutya yo oyomondoolopa, itaya pewa iikulya, yo haya yalulwa nokutulwa komiyalu dhaamboka ya hepekwa komeya gefundja ya mone omakwatho kashi li pauyuki nande, nEpangelo nali tale po nawa mpoka nokugeela Elelo lya Shakati ndyoka iha li ya popile moshinima shika shokupewa iikulya nosho tuu.
Omukuluntu gwOsenda ya Ekuku tate Martin Nalushiya, ota ti kutya ngele kwa gandjwa iikulya nosho tuu kaagandji yooshali, Elelo lya Shakati ohali ithana oonakuhepekwa komeya gefundja yomOosenda Oshoopala nEkuku ya ka helule oololi nenge iihauto mbyoka ya eta iikulya mbyoka noku ke yi tula moompungulilo moka hayi tulwa, ashike nee nonando taye yi helula ngeyi, kaye yi pewa, ohaya zi ko ashike nokushuna kootenda dhawo hoka nokusila ko ondjala kumwe naanona yawo.
‘Oshinima shika osha pumbwa okutalululwa. kashi li mondjila na kashi li wo pauyuki nandenande,’ tate Nalushiya ta ti ngawo nokwiindila kombelewa ndjoka tayi ungaunga noshinima shefundja moNooli, ano ku tate Erastus Negonga a talulule oshinima shika muule.
Nalushiya ta ti naku kale wo haku lopotwa kutya iikulya ya gandjelwe oya pewa oolye, oya gandjwa ko ingapi na opwa thigala shi thike peni.
Oonakuhepekwa komeya gefundja otaya ti wo kutya Aanangeshefa nenge omahangano gamwe sho taga gandja iikulya, ohaga tala mbyoka yi li pokukwisha nosha yela nee kutya ngele mboka taya pewa iikulya ye yi topolele onakuyinuninwa, ano oonakuhepekwa komeya gefundja ngele oya kala ye yi ngungunina, ano itaye yi topola nziya, otayi kwishile mo, yo taye ke yi gandja ya kwisha nenge ye ke yi ekelehi noku yi hepeka ngawo, yo wo taya hepeke omagano gaandji yooshali.
YomOshakati otaya ti kutya nonando haya kundana taku gandjwa oonene dhoomwe noshowo omagadhi gwokiigwayeka omuntu opo waalike koomwe, yo kaya pewa sha, noonte ndhoka ya pewa omasiku ga zi ko, dha pewa aashike yamwe nokuli, odha gandjwa kOshipangelo shEpangelo sha Shakati.
‘Yakwetu ano tse yomOshakati otwa ninga shike ano. Nande okwa li opomahogololo osho ngaa taku tiwa kutya molwashoka tse yomondoolopa inatu hogolola, nenge natu ye komagumbo getu giiti molwashoka katu longa? Taya ti nokupula ngawo. Taya ti sho ye li mootenda kaya mona oshimaliwa ngashi haye shi mono muupana wawo sho ya li komahala gawo komalukanda hoka, molwashoka mootenda kamu na Ookastoma dhoku ya landa ngashi ndhoka dha kala komahala gawo haoka ya kala kwali manga inaya tembudhwa ko molu omeya.
Mboka ye li kOsenda yOonakuhepekwa komeya gefundja kOmungwelume, nayo otaya ti kutya hela ya yile ko inaya pewa iikulya nonando shi shiwike nawa kutya omagumbo gawo niigandhi yawo yiilya oga halankanithwa po komeya gefundja. taya ti hela ngaa ya talelwe po kOmupresidende Hifikepunye Pohamba omathimbo ga zi ko, aawiliki yawo ngashi Ookaansela, Gavena gwawo noshowo mwene gwomukunda gwawo, kuyo kaye ya ko wenoye li ashike muuwike taya sile mo kondjala ngawo.
Uundjugo wa telwe po kau na omapoto naantu otayi ikwathele ashike miihwa moka.
kEpaulo, Meya gwa Shakati me Katrina Shimbulu okwa koleka ko The Namibian kutya oshoshili, naye okwa kundana kutya aantu yawo kOshoopala nokEkuku oye li ko kaye na iikulya, na otaya ka pewa iikulya muule woshiwike shika.