Oonakufekelwa meso lya Izak Dreyer ina ya kwatwa natango

MBOKA taya fekelwa ya dhipaga nenge ye etitha eso lyo munafaalama omukulupe pofaalama ya Uhlenhorst, omusamane, Izak Dreyer [85] natango inaya monika.

Pahapu dhomukuluntu gwopolisi moHardap, komufala, Kobus Meyer, omanyala ngoka gaadhika pofaalama ndjoka otaga yelekanithwa naangoka giiningwanima yafa shoka ya za monakuziwa pu talike ngele opena ekwatathano. Ofaalama ndjika oyi li moshitopolwa sha Uhlenhorst-Hoachanas-Derm pokati ka Rehoboth na Dordabis. Meyer okwa ti nonando oye na omafekelo, sigo oompaka inaya kwata omufekelwa. Dreyer ota ku fekelwa a si pokati kootundi 03h00 sigo 04h00 yongula yetine oshiwike shayi konima sho ongundu yoombudhi ntano dheya pofaalama ye noku dhenga mwene gwofaalama ndjoka nokumumanga omanga inaadhi ya ontuku noshiketha shiipungulwa, ehauto lyoshikoto, noshowo iikuti yondjembo. Okwa ti nonando ita ya fekele nando omuniilonga gumwe pofaalama, Meyer okwa ti yo ota shi vulika ya ka pula pule aaniilonga mbaka. Aaniilonga oya ti oya li ya dhiladhila kutya ngiika Dreyer oye mwene a hingi po osheenditho she unene okushitalela methimbo ndyoka shoka sha ningwa ongula onene. Meyer okwa ti omudhimba gwa Dreyer otagu ka tandwa, oku tala ngele pamwe Dreyer okwa si komutima nenge pamwe okwa si sho a mangwa komulungu koonakumu ponokela. Okwa ti nonando omunafaalama nguka okwa adhika ena uukwadhula kolutu lwe ita shi ulike kutya okwa tsuwa nenge a yahwa. Meyer okwa ti pehala mpoka opwaa dhika oongaku ntano dha enda po. Okwa ti aafuthi mboka konima sho ya shinagula iinima mondunda ya nakusa Dreyer oya zipo mpoka ya kutha ohauto yobakkie, noshowo ohauto yawo ndjoka ye ya po nayo nokuya ontuku.Obakkie ya nakusa Dreyer oya ka adhika ya thigwa mooha dhondjila ookilometa 35 okuya ko Rehoboth. Ehangano lyaanafaalama po Uhlenhorst olya uvaneke oodola 50 000 ku kehe gumwe ngoka ta gandja uuyelele tawu kwatitha aafekelwa mboka.